Үүнэр сылга Хайахсыттан төрүттээх биллиилээх олоҥхоһут Иннокентий Теплоухов-Тимофеев төрөөбүтэ 155 сыла туолар. Ол чэрчитинэн эһиил кини уус-уран айымньытыгар — «Куруубай хааннаах Кулун Куллустуур» олоҥхо иккис үйэтин ис хоһоонугар олоҕуран, улууска улахан испэктээк туруоҕа. Бу туһунан улуустааҕы култуура салалтатын методическай отделын үлэһитэ Туйаара Северьянова билиһиннэрдэ.
Олоҥхо-испэктээк тахсыытыгар былааннаах үлэни ыытарга, айар бөлөҕү тэрийиигэ бастакы сүбэ мунньах буолла.
Дьаһалга улуус баһылыгын социальнай боппуруостарга солбуйааччы Мария Кронникова, улуустааҕы култуура салалтатын начаалынньыга Петр Гуляев, улуус 8 норуодунай кэлэктиибэ уонна И.Г. Теплоухов-Тимофеев аатын сүгэр Хайахсыттааҕы норуот айымньытын дьиэтин үлэһиттэрэ кыттыыны ыллылар.
Испэктээк сүрүн туруорааччы режиссерынан Василий Николаев ананна. Сценарийы суруйууга Мария Герасимова, Дмитрий Попов, Оксана Монастырева уонна Валерий Герасимов үлэлэһиэхтэрэ. Маны сэргэ мунньахха режиссураҕа, испэктээк идиэйэтин, көстүүтүн тиэрдиигэ, ырыаны, тойугу бэлэмнииргэ, муусуканан киэргэтиигэ, үҥкүү туруоруутугар, көстүүмнэри, реквизиттары бэлэмнииргэ, испэктээги тарҕатыыга эппиэтинэстээх дьону анаатылар.
Манна эбии Чурапчытааҕы норуодунай тыйаатыр уонна Олоҥхо киинэ сэтинньи 25-26, ахсынньы 2-3 күннэригэр испэктээккэ кыттыан баҕалаах дьону сүүмэрдиэхтэрэ.
Марфа Петрова.
