Чурапчы улууһугар үгэскэ кубулуйбут “Кросс нации-2025” сүүрүү бүгүн, алтынньы ыйын 1 күнүгэр, Чурапчы нэһилиэгин Егор Борисов аатынан уулуссаҕа, чуолаан Степан Макаров аатынан Чурапчытааҕы гимназия тэлгэһэтиттэн саҕаланна.
Күрэхтэһии үөрүүлээх арыллыыта итиэннэ сүүрүүгэ анал нүөмэрдэри түҥэтии сарсыарда 9 чаас 30 мүнүүтэҕэ буоллаҕа. Кылгас разминка кэнниттэн 10 чаастан саҕалаан саастарынан наардааммыт бөлөҕүнэн улахан сүүрүү старт бэрилиннэ.
Манна: 6-8-с кылаас оҕолоругар, Хатылыттан сылдьар, Юра Захаров интэринээт-оскуола 8-с кылааһын үөрэнээччитэ биэтэккэ бастакынан кэллэ.
Кыргыттарга бастакынан, Василий Соловьев-Болот Боотур аатынан Хатылы орто оскуолатын 7 кылааһын үөрэнээччитэ Виола Захарова сүүрүүтүн түмүктээтэ.
9-11-с кылаастарга эмиэ Хатылыттан сылдьар интэринээт-оскуола 10 кылааһын үөрэнээччитэ Эрчимэн Драгунов кимиэхэ да иннин биэрбэккэ эрэллээхтик бастаата.
Кыргыттарга Мэҥэ Хаҥаластан төрүттээх, 9-с кылаас кэнниттэн үнүстүүккэ үөрэнэ кэлбит Арина Семенова соһуччу кыайда.
18-40-гар, 41-55-гэр уонна 56-тан үөһэ саастаахтарга барыларыгар биир кэмҥэ старт бэрилиннэ,
манна эр дьоҥҥо биэтэккэ бастакынан Мырылаттан төрүттээх үнүстүүт устудьуона Михаил Соловьев, Семен Новгородов аатынан Чурапчы орто оскуолатын физкултуураҕа учуутала Василий Степанов, Хатылыга сүүрүү тириэньэрэ Екатерина Даргунова кыайыылаах үрдүк аатын ыллылар.
“Быйылгы сүүрүүгэ барыта холбоон 500-тэн тахса киһи кыттыыны ылла. Тэрийээччилэргэ, учууталларга, тириэньэрдэргэ махталбыт улахан.
Халлааммыт төһө да тымныйдар бүгүн бэтэрээн сүүрүктэрбит көхтөөхтүк кыттыыны ыла кэлбиттэр. Барыта этэҥҥэ ааста, бука барыларыгар өссө төгүл улахан махталбытын биллэрэбит”, — диэн Чурапчы улууһун дьаһалтатын успуорка управлениетын начаалынньыга, бэйэтин бөлөҕөр үсүһүнэн биэтэккэ кэлбит Дьулустан Егоров санаатын эттэ.
Бастакынан сүүрэн кэлбит кыайыылаахтар – 10-нуу устуука фирменнэй футболкалары наҕараада быһыытынан туттулар.
Сэмэн ЖЕНДРИНСКЭЙ. Ааптар хаартыскаҕа түһэриитэ