Дьиэ аһыллыытын үөрүүлээх чааһыгар СӨ гражданскай оборонатын уонна нэһилиэнньэ олоҕор-дьаһаҕар куттал суох буолуутун хааччыйар миниистирэ Дмитрий Лепчиков, СӨ быыһыыр сулууспатын начаалынньыга Иннокентий Андросов, Тааттатааҕы көрдүүр-быыһыыр этэрээт салайааччыта Павел Попов, о.д.а. кэлэн эҕэрдэлээтилэр.
Николай Терютин салайааччылаах быыһыыр этэрээт чэпчэкитэ суох үлэлэрин быыһыгар дьиэни бэйэлэрин күүстэринэн тутан, олоххо киллэрдилэр. Дьиэ улуус салалтатын быһаччы хонтуруолунан, улуус фондатын көмөтүнэн тутулунна.
«Биһиги этэрээппитигэр бэһиэбит. Тиэхиньикэлэрбитигэр биир УАЗ, биир кыра квадроцикл уонна моторка бааллар. Күннээҕи үлэбитигэр уонна быыһыыр түгэҥҥэ туттар инструменынан хааччыллан олоробут. Ыксаллаах быһыы-майгы дьыл кэминэн баран иһэр. Кыһынын тоҥуу-хатыы, суол саахала, саас халаан уута, салгыы ойуур баһаара, күһүнүн сир астааччылар, булчуттар сүтүүлэрэ, ити курдук бара турар.
Сыл аайы куурустарга баран үөрэнэбит, идэбит таһымын үрдэтэбит. Хайысхабыт элбэх буолан, араас идэлээхтэр биһиэхэ үлэлии киириэхтэрин сөп. Ол курдук медик, слесарь, электрик, баһаарынай, спортсмен, юрист — барыта биһиги эйгэбитигэр барсаллар«, — диэн салайааччы Николай Терютин үлэтин туһунан кэпсиир.
Кини саҥа дьиэ үлэ өссө таһаарыылаах буоларыгар тирэх буоларын бэлиэтээн туран, улуус баһылыгар, министиэристибэлэргэ, бырабыыталыстыбаҕа махталын тиэрдэр.
Елена Макаринская