Чурапчы улууһугар Дойду Бэрэсидьиэнин сорудаҕынан ылыныллыбыт социальнай гаастааһын бырагыраамата ситиһиилээхтик үлэлиир. Бүгүн, Саха Өрөспүүбүлүкэтин судаарыстыбаннаһын күнүгэр, Чурапчы нэһилиэгин «Спортивнай» түөлбэтигэр 10-с пусковой гаас ситимэ холбонон, олохтоохтор үөрүүлэрэ муҥура суох.
Бэлиэ түгэнинэн CӨ Ил Дархана Айсен Николаев быһа биэриинэн холбонон, нэһилиэк дьонун-сэргэтин эҕэрдэлээтэ.
«В этот знаменательный день одновременно в разных уголках нашей республики открываются 10 самых разных объектов. Это действительно масштабное событие, праздник для кажного из нас. Я от всей души поздравляю вас, вместе с вами радуюсь. В эти объекты вложены более 2 милиардов рублей, это значительный вклад для улучшения качества жизни наших людей. Каждый объект, который сегодня открывается, меняет жизнь людей к лучшему», — диэн эттэ Айсен Николаев.
Тэрээһин үөрүүлээх чааһыгар улуус баһылыгын бастакы солбуйааччы Рустам Данилов, улуус дьокутааттарын Сэбиэтин бэрэссэдээтэлэ Яков Оконешников, “Сахатранснефтегаз” АО генеральнай дириэктэрин үп чааһыгар солбуйааччы Анатолий Соловьев, Чурапчы нэһилиэгин баһылыгын социальнай боппуруостарга солбуйааччы Варвара Макарова түөлбэ олохтоохторун гаас ситимигэр холбоммуттарынан эҕэрдэлээтилэр, гаастааһыҥҥа үлэлээбит-хамсаабыт, дьоһун кылааттарын киллэрбит дьоҥҥо наҕараадалары туттардылар.
Людмила Винокурова, “Спортивнай” түөлбэ олохтооҕо: “Бүгүн биһиги түөлбэбитигэр олус үөрүүлээх тэрээһин буолла. Биһиэхэ интэринээт-оскуола томторугар гаас киирбитэ үһүс сыла, уочаратынан киирэн иһэр. Быйыл биһиэхэ Дмитрий Коркин аатынан уулуссаҕа киирэн, дьиэбит сып-сылаас. Онон өрөспүүбүлүкэбит, улууспут, нэһилиэкпит салалталарыгар олохтоохтор ааттарыттан истиҥ махталбытын тиэрдэбит. Тыа сиригэр гаас ситимэ киириитэ — бу олох сайдыытын биир улахан көрдөрүүтэ буолар”.
Платон Коркин, «Спортивнай» түөлбэ олохтооҕо: «Мин өрөспүүбүлүкэбит Ил Дарханыгар Айсен Николаевка, бырабыыталыстыбабыт, улууспут, нэһилиэкпит дьаһалтатыгар дириҥ махталбын тиэрдэбин. Гаас киириитэ диэн улахан үөрүү буоллаҕа. Урут биһиги мас бөҕө мастаан, саһаан бөҕө кэрдэн, оһох оттунан кэллэхпит. Билигин уот оттон бүттүбүт, айылҕабыт чөл буолуо. Биһиэхэ бириэмэ бөҕө таҕыста, инньэ гынан үөрүүбүт улахан. Барыгытыгар чөл олоҕу, этэҥҥэ буолууну баҕарабын».
Людмила Горохова, автор хаартыскаҕа түһэриитэ, видеоҕа устуута.