Бүгүн Сахабыт Өрөспүүбүлүкэтин күнэ. Бу күн 1922 сыллаахха РСФСР иһинэн Саха АССР тэриллибитэ. 1992 сыллаахха Саха автономиятын 70 сыллаах үөрүүлээх күнүгэр муус устар 27 күнэ – Өрөспүүбүлүкэ күнүнэн биллэриллибитэ.
Чурапчы нэһилиэгэр “Улуу Өктөөп 50 сылыгар” анаммыт мемориалга биллэр Судаарыстыбаннай диэйэтэл Иван Винокуров бүүһүгэр сибэкки дьөрбөтүн уурдулар. Үөрүүлээх дьаһалга улуус, нэһилиэк дьаһалталара, үөрэх эйгэтин, култуура салаатын бары үлэһиттэрэ уонна уопсастыбаннас көхтөөх кыттыыны ыллылар.
Улуус баһылыга Степан Саргыдаев, дьокутааттар Сэбиэттэрин бэрэссэдээтэлэ Яков Оконешников, нэһилиэк баһылыга Владимир Сивцев бэлиэ күнүнэн эҕэрдэлээтилэр. Саха норуотун чулуу уолаттарын Максим Аммосовы, Былатыан Ойуунускайы, Исидор Бараховы, Степан Аржакову, Иван Винокуровы уо.д.а. истиҥник ахтан-санаан ааһарбыт, кинилэр сырдык ааттарыгар сүгүрүйэрбит, маннык тэрээһиннэр ыччакка үтүө өйдөбүл буолалларын эттилэр. Саха сирэ тэтимнээхтик сайдарын, бу ситиһии өрөспүүбүлүкэ дьонун-сэргэтин үлэтинэн-хамнаһынан, сыратынан ситиһиллэрин бэлиэтээтилэр.
Салгыы киин болуоссакка Добун оһуохай тэрилиннэ. Оһуохайы норуот үгэһин илдьэ сылдьааччылар Семен Морфунов, Клара Кондратьева уонна Александра Игнатьева таһаардылар.
Елена Макаринская
Наталья Сибирякова видеота