Чурапчы улууһугар сэтинньи 14- ахсынньы 6 күннэригэр Доруобуйаларынан хааччахтаах дьон декадалара ыытылла турар. Ол чэрчитинэн А.К.Софронов аатынан спорт киинигэр «Бииргэ – дьоллоохпут!» диэн улуустааҕы дьиэ кэргэн күрэҕэ үрдүк таһымнаахтык буолла. Күрэх сүрүн сыалынан доруобуйаларынан хааччахтаах оҕо дьиэ кэргэнигэр сыһыаны тупсарыы, чөл олоҕу тарҕатыы буолар.
Тэрээһин туһунан доруобуйаларынан хааччахтаах дьон түмсүүтүн салайааччыта Саргылаана Хоютанова билиһиннэрдэ:
— Күрэхтэһиибит үтүө үгэскэ кубулуйан, сыл аайы туһааннаах декада чэрчитинэн ыытыллара. Хомойуох иһин, пандемия кэмигэр тохтообута. Ол кэнниттэн бу саҥа ыытылынна. Онон иккистээн саҕалааһын буолан, быйыл 8 дьиэ кэргэн кытынна. Күрэхпит алта түһүмэхтэн турар. Ол курдук, кыттааччылар теннис мээчигин ньуоскаҕа ууран сүүрүүгэ, пресс хачайдааһыныгар, дартска уонна да атын судургу сорудахтары толорууга күрэхтэстилэр. Сүрүн судьуйанан улуустааҕы адаптивнай спорт исписэлииһэ Иннокентий Матвеев үлэлээтэ. Куонкуруспут, бэйэбит санаабытыгар, олус үчүгэйдик буолан ааста. Түгэнинэн туһанан, биһиги хамсааһыммытын өйүүр улуус дьаһалтатыгар, бары көмөлөспүт волонтердарга махталбытын тиэрдэбит.
Күрэхтэһии түмүгүнэн Кытаанах нэһилиэгиттэн Алик Афанасьев төрөппүттэрин кытта кыайыылааҕынан буоллулар. Иккис, үһүс миэстэни Чурапчы нэһилиэгиттэн Сандаара Слюгрова уонна Диана Захарова төрөппүттэринээн ыллылар. Бары кыайыылаахтар сыаналаах бириистэринэн, грамотанан наҕараадаланнылар.
Салгыы Алик Афанасьев төрөппүттэрин кытта улуус аатыттан «Ийэм, аҕам уонна мин – биир күүспүт» диэн өрөспүүбүлүкэтээҕи түһүмэххэ кыттыахтара. Бэлиэтээн эттэххэ, тэрээһин Чурапчыга ыытыллара былааннанар. Онон быйылгы туһааннаах декада арыый уһаан биэрдэ. Кыайбыт дьиэ кэргэҥҥэ ситиһиилэри баҕарабыт!
Альбина Лугинова, Алик ийэтэ
— Кыайан олус үөрдүбүт. Күрэхтэһэрбитигэр кыратык долгуйан ылбыппыт эрээри, бэйэбитигэр эрэллээх этибит. Уолбут тустуунан сөбүлээн дьарыктанар буолан, кыахтааҕын атын да көрүҥнэргэ эрдэ көрдөрбүтэ. Ол иһин нэһилиэкпит «Сыккыс» доруобуйаларынан хааччахтаах дьон түмсүүтүн салайааччыта Парасковья Новгородова кыттарбытыгар сүбэлээбитэ. Ону тута сөбүлэспиппит. Аҕабыт уолунаан спорка интэриэстээхтэр. Онон Кытаанах нэһилиэгин спорт инструкторын кытта үлэлэһэн күрэхтэһиигэ кытынныбыт. Түһүмэхтэртэн дартс көрүҥүн ордук ыарырҕаттыбыт. Бэрт сэргэх, сонун күрэхтэһии буолла.
Марфа Петрова