Аҕыйах сыллааҕыта «Халыма» федеральнай суол Аллараа Бэстээхтэн Чурапчыга диэри учаастага аспаалланан, чурапчылар үөрүүбүт үксээбитэ. Бу тупсубут, үчүгэй суолунан сырыыбыт элбээбитэ. Оттон билигин ол суолбут хас да сиринэн алдьаммытын-кээһэммитин үгүс айанньыт бэлиэтии көрөр. Онуоха алдьаммыт суолу өрөмүөннээһин боппуруостарын туһунан «Дорожник” ХЭТ дириэктэриттэн Василий Тимофеевтан ыйыталастыбыт.
— БиҺиги тэрилтэ «Халыма” федеральнай суол 90-190 км диэри учаастагын, ол эбэтэр сүүс килэмиэтир уһуннаах суолу көрөбүт-истэбит. Суол-иис сылын аайы ыам ыйыттан бэс ыйын ортотугар диэри күүстээх ириэриигэ алдьанар. Бары билэбит, Саха сирэ ирбэт тоҥҥо турар буолан, өрөспүүбүлүкэбит үрдүнэн сирбит хамсыы, хайа бара турар. Чурапчы улууһугар ирбэт тоҥмут өссө чугас сытар. Ол иһин сирбит-суолбут атын улуустартан ордук сиҥнэр. Аспаалламмыт суол эрдэ ирбитинэн барар. Манна эбии ыарахан тиэхиньикэ сылдьан, түргэнник алдьатан биэрэр. Ол иһин улахан уйуктаах массыыналары тохтото сатыыллар, ыйааһыны хонтуруоллуур пууннары үлэлэтэллэр. Биһиги алдьаммыт учаастактары кэтиибит. Айан куттала суох буоларыгар улахан алдьаныылары абырахтыыбыт, суол бэлиэлэрин туруорабыт. Толору саҥардан оҥорууну ириэрии кэнниттэн биирдэ, үксүгэр от ыйыттан саҕалаан өрөмүөннүүбүт.
Өрөмүөн боппуруостарыгар тохтоотоххо, быйыл Кыйыттан Чурапчы улууһун кыраныыссатыгар диэри учаастагы «Мегинские автомагистрали” тэрилтэ 9 км уһуну аспаллыахтаах. Онтон салгыы быһа холоон 3 км. уһуннаах суолга “Севдострой” тэрилтэ аспаал тэлгиэхтээх.
Ону таһынан Чурапчынан ааһар транзитнай суолу оҥоруу бырайыага Москваҕа бигэргэтиллибитэ. Ол эрээри билиҥҥи уустук балаһыаньанан үп-харчы көрүллүбэккэ, үлэ хамсаабакка турар. Уопсайынан элбэх бырайыак, бырагыраама тохтоон турар. Онон бырайыакпыт кэлэр сылга олоххо киириэ диэн эрэнэ күүтэбит. Бу быайыакка сүрүн суолга киириилэри-тахсыылари, тратуардары оҥоруу, бөҕөргөтөн биэрии, суолу кэтирэтии уонна сырдатыы ситимин тардыы барыта киирэн турар.
Суоппардарга суол бэлиэлэрин көрөн, бэйэ-бэйэҕэ убаастабыллаахтык, сэрэхтээхтик сыһыаннаһан, бытааннык айаннааҥ диэн сүбэлиибин.
Марфа Петрова