Олунньу 26 күнүгэр Чурапчыга «Социальный туризм—путь к активному долголетию» өрөспүүбүлүкэтээҕи тэрээһин буола турар. Манна Дьокуускайтан, Тааттаттан, Амматтан, Мэҥэ Хаҥаластан, Хаҥаластан бэтэрээннэр сэбиэттэрэ, аҕам саастаахтар кыттыыны ыла сылдьаллар. Күн бастакы аҥарыгар «Айылгы» норуот айымньытын дьиэтигэр «Серебряная пора» илиинэн оҥоһуктарынан быыстапка тардылынна, атыы дьаарбаҥката тэрилиннэ. Маны тэҥэ улуустар бэрэстэбиитэллэрэ минньигэс астарынан композиция оҥорон, дьон иннигэр көмүскээн «Кухня без границ» куонкуруска кытыннылар. Дьүүллүүр сүбэ быһаарыытынан бу күөн күрэскэ Таатта улууһа кыайыылааҕынан таҕыста, Мэҥэ Хаҥаластар иккис, Чурапчылар үһүс буоллулар.
Тэрээһин үөрүүлээх аһыллыытыгар Чурапчы улууһун баһылыгын бастакы солбуйааччыта Рустам Данилов ыалдьыттыы, кыттыыны ыла кэлбит улуустар бэтэрээннэрин сэбиэттэрин бэрэссэдээтэллэригэр дьаһалта аатыттан Махтал суруктары туттартаата. Саха өрөспүүбүлүкэтин сэрии, үлэ бэтэрээннэрин сэбиэтин бэрэссэдээтэлин солбуйааччыта, РФ Бочуоттаах судьуйата, СӨ үтүөлээх юриһа, Ньурба оройуонун Бочуоттаах олохтооҕо Василий Васильев эҕэрдэ тылын эттэ, наҕараадалары туттарда. Амма, Таатта, Мэҥэ Хаҥалас, Хаҥалас, Чурапчы бэтэрээннэрин сэбиэттэрин бэрэссэдээтэллэрэ сценаҕа тахсан маннык түмсэн көрсөр, уопут атастаһар, санаа үллэстэр дьоро түгэн тосхойбутуттан олус диэн үөрбүттэрин, астыммыттарын эттилэр.
Бу аҕам саастаахтар истиҥ-иһирэх көрсүһүүлэрин биир чаҕылхай түһүмэҕинэн «Икки сулус» ырыа күөн күрэһэ буолла. Кыттааччылар бары олус өрө көтөҕүллэн, долгуйан туран ылбаҕай ырыаларын мустубут дьоҥҥо-сэргэҕэ иһитиннэрдилэр. Кыһаллан, санааларын ууран туран бэлэмнэммиттэрэ тута харахха быраҕыллар.
Күн иккис аҥарыгар «Үөрүү» оҕо дьоҕурун сайыннарар кииҥҥэ араас хабааннаах маастар кылаастарга, Хатылыга көһөрүллүү түмэлигэр сылдьыахтара, бу дьоро күн үҥкүү киэһэтинэн түмүктэниэ.
Наталья Сибирякова, ааптар хаартыскалара, видеота