“Аҕа – ыал олоҕун сүрүннээччи, кэскиллээх өйү-санааны киллэрээччи” аҕалар, эр дьон форума быйыл 6-с сылын ыытыллар. Устуоруйаттан аҕаллахха, бырайыак ааптарынан “Туллукчаан” уһуйаан социальнай педагога Мария Баина, оттон тэрийээччинэн “Куоҕалы” ТОС бэрэссэдээтэлэ Федора Седалищева буолаллар. Оччолорго бу түөлбэҕэ баар тэрилтэлэр бука бары бастакы саҕалааһыны өйөөн, форум үрдүк таһымнаахтык ааспыта.
Онтон тирэхтэнэн, күн бүгүн форум улуус таһымнаах буолан, сыллата эр дьон кыттара элбээн иһэр. “Айылгы” НАДь форум үөрүүлээх аһыллыыта буолла. Киирээти кытта фойеҕа “Аҕа сатабыла” быыстапка турда.
Бэйэлэрин эҕэрдэ тылларын улуус баһылыга Степан Саргыдаев, улуус дьокутааттарын Сэбиэтин уонна улуустааҕы «Эркин» түмсүү бэрэссэдээтэлэ Яков Оконешников, Чурапчы нэһилиэгин баһылыгын солбуйааччы Варвара Макарова, Чурапчы нэһилиэгин “Удьуор” эр дьонун түмсүүтүн салайааччыта Дмитрий Слепцов, тэрийээччилэр, о.д.а. эттилэр, наҕараадалары туттардылар.
Улуус баһылыга Степан Саргыдаев дьиэ кэргэн тутулуктаах буолуутугар кылааттарын иһин махтал суругу А.К. Софронов аатынан спортивнай комплекс дириэктэригэр Михаил Степановка, С.А. Новгородов аатынан Чурапчы орто оскуолатын учууталыгар Евгений Прокопьевка уонна «Эгэлгэ» маҕаһыын үлэһитигэр Дмитрий Портнягиҥҥа туттарда.
Чурапчы нэһилиэгин аатыттан Варвара Макарова «Үтүөлээх аҕа» ааты «Саргыдай» бааһынай хаһаайыстыба салайааччытыгар Станислав Сивцевкэ, «Чурапчы нэһилиэгин сайдыытыгар кылаатын иһин» бэлиэни РФ Үлэ бэтэрээнигэр Иван Неустроевка, өйдөбүнньүк чаһылаах бочуотунай грамотаны байыаннай дьайыы кыттыылааҕар Алексей Архиповка уонна өйдөбүнньүк манньыаттаах махтал суругу «Дорожник» ХЭТ суоппарыгар Иван Поисеевка туттарда.
Аһаҕас кэпсэтиини улуус дьокутаата, “Саарба” булт-алт маҕаһыынын салайааччыта Алексей Егоров ыытта. Ыалдьыттарынан Инновационнай үөрэҕирии сайдыытын киинин салайааччыта Дмитрий Титов, СӨ Арыгы ырыынагын бэрээдэктиир салалта салайааччыта, СӨ Физкултуура уонна спорт туйгуна Матвей Лыткин, Саха судаарыстыбаннай тыйаатырын артыыһа Аркадий Николаев – Эрхан, Тулагы Киллэм нэһилиэгин баһылыга, Дьокуускай куорат аҕаларын түмсүүтүн салайааччыта Егор Попов уонна «Максимов и партнеры” юридическай хампаанньа салайааччыта, биир дойдулаахпыт Николай Максимов буоллулар.
Аһаҕас кэпсэтиигэ кэлбит эр дьон көхтөөхтүк кытыннылар, бэйэлэрин санааларын эттилэр.
Форум сүүйүүлээх оонньуунан уонна быыстапка кыттыылаахтарын наҕараадалааһынынан түмүктэннэ.
Чурапчы нэһилиэгин «Удьуор» эр дьон түмсүүтүн бэрэссэдээтэлэ Дмитрий Слепцов:
- Мин түмсүүгэ үлэлээбитим уонча сыл буолла. Үлэбит сүрүнэ оҕону иитии, булка-алка сыһыарыы уонна аҕа оруолун үрдэтии буолар. Бүгүн форуммутун алтыс төгүлүн тэрийдибит. Булт уопсастыбата, Росгвардия, лесничество, ГИБДД курдук тэрилтэлэр кэлэн кэпсээтилэр, сүбэ-ама биэрдилэр. Дьокуускайтан эмиэ биир сыаллаах-соруктаах үлэлиир ыалдьыттарбыт кэллилэр. Түмүккэ салгыы үлэлииргэ резолюция ылынныбыт.
Елена Макаринская