Чурапчыга 17-с сылын хортуоппуй сирин түөрээччи — Былатыан Куоркун

РФ суруналыыстарын Сойууһун чилиэнэ, Арассыыйа бочуоттаах кинематографиһа, үлэ, успуорт, Саха сирин киинэтин бэтэрээнэ Былатыан Баһылаайабыс Куоркун төһө даҕаны биэнсийэҕэ тахсан олордор үлэттэн илиитин араарбат.

Өрөспүүбүлүкэ биир биллэр, тустуу эйгэтигэр бастыҥ ыспартыыбынай суруналыыс Былатыан Баһылаайабыс бу ый саҥатыгар лоп курдук 76 сааһын туолбута. Өссө 1978 сылтан ыла, кини ыстатыйалара “Саҥа олох” хаһыакка бэчээттэнэллэр. Биллэр уопсастыбаннай суруналыыс суруйуулара куруук ааҕааччылары сэҥээрдэр, элбэҕи сырдатар дьоһун аналлаахтар. Тыа сирин талааннаах суруналыыһын, успуорт эйгэтин утумнаахтык сырдатан кэлбитин улууска уонна өрөспүүбүлүкэҕэ үрдүктүк бэлиэтииллэр.

Аҕыйах сылтан бэттэх, Былатыан Баһылаайабыс тимир көлөтүн саҥардан, уруккутунааҕар өссө күүскэ тэһииннээн, эдэрдии эрчиминэн быйыл эмиэ, бар дьонун туһугар хортуоппуй сирин оҥоруутугар таҕыста.

“Бүгүн үһүс күммэр сылдьабын, 16-с ыалбар айаннаан иһэбин. Хортуоппуй сирин оҥоруутунан 2007 сылтан саҕалаан дьарыктанабын. Сыананы соччо үрдэппэппин, хортуоппуй сирин иэниттэн көрөммүн быһабын”, — диэн Былатыан үлэһит киһи сиэринэн бэрт судургутук хоруйдаат, чэрдийбит кэтит ытыһынан илиибин бобо тутта уонна тыраахтырын собуоттаан илин диэки айанната турда.

Хотуоппуй сирин оҥотторуон баҕалаахтар бу 8984-116-74-50,  8964-423-14-50 нүөмэрдэргэ билсиэххитин сөп.

 

Сэмэн Жендринскэй