Кулун тутар 14-15 күннэригэр Уус Алдан улууһун Найахы нэһилиэгэр XI-с төгүлүн учуутал, оскуола дириэктэрэ, “Найахы” сопхуос парткомун бастакы сэкэритээрэ, төрүт оонньуу пропагандиҺа В.Г.Дмитриев сырдык кэриэһигэр хабылыкка, хаамыскаҕа республиканскай турнир буолан ааста. Уопсайа 14 хамаанда, 134 кыттааччы муһунна.
Чурапчы улууһуттан 13 киһилээх хамаанда киирэн кыттыыны ылла.
Бастакы күн – “Сулус”, “Умсаах”, “Күөрэгэй” оонньуу саастарынан алта бөлөҕүнэн күрэхтэстилэр.
Манна Кэскил Михайлов — 1 миэстэ, Арина Кузьмина — 2 миэстэ, Эрчим Барашков — 3 миэстэ, Андрей Деллохов — 3 миэстэ уонна маннык улахана күрэххэ аан маҥнайгытын оонньоон Никифор Максимов, күүстээх оонньооччулары кыайан 2-с миэстэни ылла.
“Умсаах” көрүҥэр Кэскил Михайлов өрөспүүбүлүкэ рекордун 2370 очукуонан толордо.
Иккис күн, “Хабылык 5”, “Хаамыска 5”, “Хаамыска 7” көрүҥнэргэ бэйэтин бөлөҕөр, сахалыы остуол оонньууларыгар СӨ успуордун маастара, Төлөй орто оскуолатын дириэктэрэ Андрей Деллохов боруонса мэтээли ылары ситистэ.
“Абсолютнай күрэхтэһиигэ Кэскил Михайлов, Арина Кузьмина үчүгэйдик киирсэннэр бастыҥнар истэригэр сылдьалларын туоһулаатылар. Кыах төһө баарынан оонньуу сатаатыбыт”, — диэн Андрей Васильевич санаатын үллэһиннэ.
Инньэ гынан икки күн түмүгүнэн Чурапчы улууһун хамаандата — 6 мэтээли ылары ситистэ.
“Манчаары” Оонньуулара буолар сылыгар ыспартысымыаннарбытыгар өссө улахан ситиһиилэри баҕарыаҕыҥ.
Сэмэн ЖЕНДРИНСКЭЙ