Бүгүн Чурапчытааҕы Оҕо бибилэтиэкэтин үлэһиттэрэ хаһыс да сылларын, 1-8 кылаас үөрэнээччилэрин ортотугар “Бастыҥ буочар” бэйэни тургутуу күрэҕин тэрийэн ыыттылар. Бу тэрээһин бүгүҥҥү Аан дойду үрдүнэн илиинэн суруйуу күнүн чэрчитинэн сахалыы сурукка—бичиккэ болҕомто уурар сыаллаах тэрилиннэ.
Быйылгы сыллаахха оҕолор кыттааһыннара көхтөөх буолан, түөрт кабинетынан олорон суруксуттаатылар, манна Чурапчы нэһилиэгин түөрт оскуолаларыттан уонна Одьулуун орто оскуолатыттан барыта холбоон 62 оҕо кэлэн кыраһыабай буочардарын көрдөрдүлэр.
Кыттааччылар саха литэрэтиирэтин айымньыларыттан кылгас кээмэйдээх тиэкистэри сыыһата суох, кэрэ буочарынан устан бэйэлэрин тургутан көрдүлэр. Таабырын таайыстылар, оонньоотулар, үөрдүлэр-көттүлэр.
Итини таһынан кыттааччыларга анаан Одьулуун орто оскуолатын 8 кылааһын үөрэнээччитэ Лев Седалищев 154 устуука уруучука мунньуммутун аҕалан көрдөрдө, кинини сэргэ быыстапкаҕа оройуоннааҕы “Айылгы” НАДь-тин уокка-күөскэ, муусукаҕа оператора Гаврил Лыткин коллекциятыттан 264 уруучука итиэннэ Чурапчытааҕы аграрнай-техническэй кэллиэс преподавателэ Розалия Пономарева “Города и страны” диэн омук сириттэн аҕалбыт уруучукалара оҕолор киэҥ сэҥээриилэрин ыллылар.
Дьүүллүүр сүбэ ким саамай бастыҥ буочардааҕын хас да критерийинэн көрөн сыаналаатылар.
Күрэх түмүгүнэн, 1-4 алын сүһүөх кылаастарга:
1 миэстэ – Алиса Егорова 4 “а” кылаас (Семен Новгородов аатынан Чурапчы орто оскуолата);
2 миэстэ – Амина Андросова 4 “а” кылаас (Семен Новгородов аатынан Чурапчы орто оскуолата);
3 миэстэ – Валентина Илларионова 4 “а” кылаас (Семен Новгородов аатынан Чурапчы орто оскуолата).
Бу үөһэ ааттаммыт оҕолор эрдэ улахан дьоҥҥо ыытыллыбыт каллиграфическай буочар күрэҕэр улахан биһирэбили ыланнар анал бирииһинэн наҕаарадаламмыттара, кылаас салайааччыта Луиза Егоровна Максимова буолар.
“Кыһаллымтыа буочар” номинацияҕа – Никита Егоров 1 “а” кылаас (Иван Павлов аатынан Чурапчы орто оскуолата, “Кичэллээх буочар” – Арина Попова 3 кылаас (Иван Павлов аатынан Чурапчы орто оскуолата) тигистилэр.
5-8 кылаастарга:
1 миэстэ – Анжелика Иванова 5 “а” кылаас (Дмитрий Коркин аатынан интэринээт-оскуола);
2 миэстэ – Нарыйа Седалищева 6 “б” кылаас (Семен Новгородов аатынан Чурапчы орто оскуолата);
3 миэстэ – Алексанна Андросова 6 “б” кылаас (Семен Новгородов аатынан Чурапчы орто оскуолата).
“Бэчээтинэй буочар” номинацияҕа Маша Михайлова 8 “а” кылаас (Чурапчы гимназията), “Ойуулуур-дьүһүннүүр буочар” номианцияҕа Алеся Пинигина 8 “г” кылаас (Семен Новгородов аатынан Чурапчы орто оскуолата) тигистилэр.
Кыттааччылар бары анал аат, туоһу сурук тутан тарҕастылар.
Сэмэн ЖЕНДРИНСКЭЙ