Аҕа дойду дьоруойдарын күнүн чэрчитинэн Москва куоракка бүтүн Арассыыйатааҕы Патриотическай форум алтыс төгүлүн ыытыллынна. Бу форумҥа араас регионнартан 1000-тан тахса киһи кэлэн кытынна, ол иһигэр Саха Сириттэн үс буолан сырыттыбыт.
Дьаһалга тэриллибит былаһааккаларга Российскай Федерация государственнай думатын депутааттара, Арассыыйа үрдүкү салалтатын бэрэстэбиитэллэрэ, салайааччылара, Россия Дьоруойдара, Анал байыаннай дьайыы кыттыылаахтара, биллиилээх артыыстар, суруйааччылар, патриотическай, уопсастыбаннай тэрилтэлэр актыбыыстара, үөрэх эйгэтин үлэһиттэрэ, политологтар, философтар, ыччат тэрилтэлэрин бэрэстэбииттэллэрэ патриотическай иитии эйгэтигэр саамай суолталаах боппуруостары дьүүллэстилэр, ырытыстылар.
Икки күн устата сарсыардаттан киэһээҥи диэри араас тиэмэлээх сессиялар буоллулар. Ол курдук, сүрүн болҕомтону оҕо уонна ыччат иитиитигэр уурдулар. Дойду историятын чахчыларын сөпкө тиэрдиигэ, оҕо дойдутун историятын билэн, ытыктыыр туһугар үлэни ыытыыга, героизм уонна патриотизм суолтатын өйдөтүүгэ, наставник суолтатын арыйыыга, туризм нөҥүө историяны харыстааһыҥҥа, ыччаты кытта үлэҕэ саҥа сүүрээннэри туһанарга уо.д.а сытыы боппуруостарга спикердар санааларын иһиттибит.
Тус бэйэм бу хайысхаҕа таһаарыылаахтык үлэлиир салайааччылары, биллиилээх дьону илэ харахпынан көрөн — истэн, уопут ылар олус долгутуулаах буолла.
Бэлиэтээн эттэххэ, улахан институттар чинчийии үлэтин ыытан, сүрүн сытыы кыһалҕалар ыччаттартан тутулуктааҕын быһаарыбаттар. Холобур, ыал буолуу, демография, үөрэхтээһин, кадр тиийиитэ, бу барыта бастатан туран, дойдубут ыччата хайдах өйдөөх-санаалаах, сыаннастардаах, токуйдаах үүнэн-сайдан тахсалларыттан тутулуктаах эбит.
Ол иһин ыччакка болҕомто ууруллан, туһааннаах бырагыраамалар, хайысхалар, хамсааһыннар үлэлииллэр. Бастакылар хамсааһыннара, Юнармия, Оҕо саас Навигатордара, Эн Дьоруойун, Росмолодежь, Роспатриот хамсааһыннарын олус бэркэ истэн билэбит. Бу хайысхалар сотору кэминэн өссө киэҥ хабааннаахтык үлэлэрэ ыытыллара күүтүллэр. Ону таһынан форумҥа ураты болҕомто Кыайыы 80 сылыгар бэлэмнэнии боппуруостарыгар ууруллунна.
Түгэнинэн туһанан бу дириҥ суолталаах тэрээһиҥҥэ элбэх ыччаттан талыллан тиийбиппэр көмө, өйөбүл буолбут улууһум дьаһалтатыгар махталбын тиэрдэбин.
Патриот диэн төрөөбүт дойдутун ытыктыыр, өбүгэлэрин сирэ сайдарын туһугар үлэлиир, айылҕатын харыстыыр киһи буолуохтаах. Онон, туох барыта бэйэбититтэн тутулуктааҕын өйдөөн туран, кэлэр кэнчээригэ холобур буолан, билиибитин кэҥэтэргэ, алтыһарга, дойдубут сайдарын туһугар кылааппытын киллэрэ, дьулуһа туруохха диэн ыҥырабын.
Вероника Маркова, Чурапчы нэһилиэгин ыччата.