Бүгүн улуус мунньаҕын планеркатыгар “Чурапчы улууһа” МО сирин-уотун, баайын-дуолун салайар кэмитиэт салайааччытынан анаммыт Леонид Степанович Макаровы, улуус баһылыга Степан Саргыдаев билиһиннэрдэ.
Эрдэ бу дуоһунаска өр кэмҥэ үлэлээбит Рустам Данилов кэлин үрдээн, былырыыҥҥыттан саҕалаан “Чурапчы улууһа” МО баһылыгын 1-кы солбуйааччытынан ананан билигин бэрт таһаарыылаахтык үлэлии-хамсыы сылдьар. Кини кэнниттэн быстах бириэмэҕэ “Чурапчы улууһа” МО сирин-уотун, баайын-дуолун салайар кэмитиэт салайааччытын эбээһинэһин толорооччунан Дария Барашкова олордо.
Ыспыраапка
Леонид Степанович Макаров 1984 сыллаахха муус устар 13 күнүгэр Чурапчы нэһилиэгэр күн сирин көрбүтэ. Маҥнай 2006 сыллаахха Дьокуускайдааҕы тыа хаһаайыстыбатын техникумун “Судаарыстыбаннай уонна муниципальнай управление” исписээлинэстээх ол кэнниттэн 2018 сыллаахха Дьокуускайдааҕы судаарыстыбаннай тыа хаһаайыстыбатын академиятыгар “Землеустройство и кадастры” исписээлинэһи ситиһиилээхтик түмүктүүр.
Үлэ карьератын 2000 сыллаахха “Маарыкчаан” ПО-ҕа хачыгаар дуоһунаһыттан саҕалаабыт уол буолар. Кэлин 2007 сылтан идэтинэн техник-землеустроителинэн Дьокуускайга оттон 2008 сылтан төрөөбүт Чурапчытын нэһилиэгэр кэлэн землеустроителинэн, 2013 сылтан нэһилиэк иһигэр кэмитиэт бэрэссэдээтэлинэн, 2013-2015 сылларга нэһилиэк дьаһалтатыгар суол-иис пуондатын начаалынньыгынан, 2015-2019 сылларга нэһилиэк дьаһалтатыгар кылаабынай исписэлииһинэн үлэлии сылдьан урбаан эйгэтигэр барбыта.
Кэргэннээх, оҕолоох.
Эдэр, эрчимнээх салайааччы уолга инники үлэтигэр-хамнаһыгар ситиһиини, кытаанаах доруобуйаны, төрөөбүт улууһун дьонун-сэргэтин интэриэһин көмүскүүр, туруорсууларын өйүүрүгэр баҕарыаҕыҥ!
Сэмэн ЖЕНДРИНСКЭЙ