Чурапчы улууһун баһылыгын Ороһуоспатааҕы баалыгар бастыҥ үөрэнээччилэр чиэстэннилэр

Үгэскэ кубулуйбут баһылык баалыгар  “Сыл бастыҥ үөрэнээччитэ”, “Сыл бастыҥ уопсастыбанньыга”, “Сыл бастыҥ спортсмена” анал ааттар туттарыллаллар.

“Сыл бастыҥ үөрэнээччитэ» анал ааты С.А. Новгородов аатынан Чурапчы орто оскуолатыттан Николай Александров, Арыылаахтан Мария Демьянова, Сылаҥтан Василий Дьячковскай, Чурапчытааҕы гимназияттан Анна Захарова уонна Светлана Слепцова, Чакыртан Айсена Михайлова, Мугудайтан Юлиана Пермякова, Төлөйтөн Григорий Попов, Одьулуунтан Алгыс Халгаев, Хатылыттан Милена Холмогорова ыллылар.

«Сыл бастыҥ уопсастыбанньыга» анал аакка Хадаартан Дайаана Барахсанова, Бахсыттан Айыына Владимирова, Алаҕартан Александр Говоров, Дириҥтэн Дайаана Иванова, И.М. Павлов аатынан Чурапчы орто оскуолатыттан Радик Кривошапкин, Чурапчытааҕы гимназияттан Богдан Логинов уонна Дайаана Рожина, С.А. Новгородов аатынан Чурапчы орто оскуолатыттан Айтал Никифоров, Кытаанахтан Айсена Скрябина тигистилэр.

«Сыл бастыҥ спортсмена» анал ааты Д.П. Коркин аатынан ЧРОСИО үөрэнээччилэригэр Аэлита Бродниковаҕа, Айсен Давыдовка, Алина Кардашевскаяҕа, Ариан Оконешниковка, Марианна Ушницкаяҕа, Уйусхан Халгаевка, Хадаартан Айтал Григорьевка, Оҕо спортивнай оскуолатыттан Вадим Поповка, Артем Слепцовка уонна Артур Собакиҥҥа иҥэрдилэр.

Үөрэх салалтатын начаалынньыга Юрий Посельскай «Билинии» анал ааты Ольга Гурьеваҕа, Сайыына Местниковаҕа, Ирина Пермяковаҕа уонна Арина Сотниковаҕа туттарда.

Оҕолор ааттарыттан харда тылы Чурапчы кэскилэ оҕо хамсааһынын лидерэ Богдан Логинов эттэ уонна оҕолор илиинэн оҥорбут оҥоһуктарын улуус баһылыгар бэлэх уунна.

Улуус баһылыга Степан Саргыдаев: “Ааспыт сыл үөрэхтэээһин эйгэтэ үгүс ситиһиилэрдээх ааста. Үөрэнээччилэрбит олимпиадаларга, спортка, уопсай уонна биир кэлим эксээмэннэргэ, дойдуга бэриниилээх буолууга чаҕылхай ситиһиилэрдээхтэр.

“Инникигэ хардыы” республикатааҕы научнай-практическай конференцияҕа иккис сылбытын бастакы миэстэҕэ таҕыстыбыт. “Снежный барс” байыаннай-патриотическай күрэхтэһиигэ Чурапчы хамаандата кубогы үһүс төгүлүн дойдуларыгар илдьэ хаалбыттарыттан киэн туттабын. Биир кэлим эксээмэҥҥэ үс сыл устата  100 баалы ылан кэллибит. Ааспыт сыллааҕы выпускник Тимур Куличкин 100 баалы информатикаҕа ылан, улууһун дьонун үөрдүбүтэ. Сыл саҕаланыыта Николай Тарскай кэриэһигэр ыытыллыбыт көҥүл тустуу чемпионатыгар оҕолорбут 1-кы миэстэни  ылан, сылы эмиэ ситиһиилээхтик саҕалаатылар. Быйыл бу тэтими ыһыктыбакка, бары хайысхаларга үрдүк ситиһиилэри аҕалыахтара диэн эрэнэбин”, — диэн баҕа санаатын эттэ.

Айыына Владимирова, Бахсы орто оскуолатын үөрэнээччитэ:

  • Бүгүн “Сыл бастыҥ уопсастыбанньыга” ааты ылбыппыттан олус үөрдүм. Оскуола уопсастыбаннай олоҕор актыыбынай кыттыыны ылабын. “Движение первых” араас тэрээһиннэригэр кыттабын. Былырыын Бэс Чагдаҕа, Тулаҕа профориентационнай турга, туризмҥа “Профессионалы” куонкуруска, “Университетская смена” курдук дьаһалларга сылдьан, элбэҕи билбитим-көрбүтүм.

Елена Макаринская