Бу туһунан СӨ Ил Дарханын уонна Бырабыыталыстыбатын пресс-сулууспата суруйар. Дойду субъектарынан “Ыччат эрэгийиэнэ” ыччат бэлиитикэтин кэлимник сайыннарыы “Үөрэх” национальнай бырайыагынан от ыйыттан Саха сиригэр “Ыччат десана” бырайыак үлэтин саҕалаабыта.
Бырайыак нэһилиэнньэҕэ ол иһигэр байыаннай дьайыы кыттыылаахтарын дьиэ кэргэттэригэр көмөлөһөргө туһуланар.
Санатан эттэххэ, от ыйыгар “Ыччат десана” икки оройуоҥҥа үлэлээбитэ. Ол курдук от ыйын 14-16 күннэригэр Амма улууһугар сылдьыбыттара. Манна “ZEMА” өрөспүүбүлүкэтээҕи ыччат уопсастыбаннай тэрилтэтин 50-тан тахса көхтөөх ыччата кыттыбыта. Икки күн иһигэр 15 ыалга байыаннай дьайыы кыттыылаахтарын дьиэ кэргэттэригэр уонна биэнсийэлээхтэргэ көмө оҥорбуттара.
“От ыйын 29 күнүттэн атырдьах ыйын 1 күнүгэр диэри 54 волонтер Таатта оройуонугар тахсан 20 ыалга көмөнү оҥордо. Хаһаайыстыбаларыгар көмөлөстүлэр: мас хайыттылар, олбуор бөҕөргөттүлэр, тиэргэн иһин хомуйдулар», — диэн Саха сирин улуустарынан “Zема” ыччат уопсастыбаннай тэрилтэлэрин холбоһугун бэрэссэдээтэлэ Алгыстаан Софронов кэпсээтэ.
Ону таһынан эдэр дьон нэһилиэнньэлээх пууннары тупсарыыга көмөлөстүлэр: эбийиэктэри кырааскалаатылар, эргэ хотоннору көтүрдүлэр. Тыа сирин олохтоохторо дириҥ махталларын биллэрдилэр.
Алгыстаан Софронов сотору кэминэн ыччат десана улуустарынан айанныырын туһунан иһитиннэрдэ. Ол курдук, атырдьах ыйын 18-21 күннэригэр Өлүөхүмэ оройуонугар онтон атырдьах ыйын 18-20 күннэригэр Чурапчы улууһугар айаннаан кэлиэхтэрэ.
Сэмэн Жендринскэй