«Айылгы» Норуот айымньытын дьиэтигэр Араассыыйаҕа Дьиэ кэргэн, Саха сиригэр Оҕо саас уонна улууска Ыал саргытын сылын чэрчитинэн улуустааҕы «Ыал саргыта» дьиэ кэргэн форума ыытылынна.
Барыта 17 нэһилиэктэн 218 киһи кыттыыны ылла. Дьаһалга кэлбит ыалдьыттары Мугудай нэһилиэгин «Сайдыына” дьахтар түмсүүтэ алгыстаах алаадьынан, сылаас чэйинэн күндүлээтилэр.
Дьиэ кэргэн уйгутун тупсарыыга туһуламмыт форум сэттэ былаһаакканан үлэлээтэ: «Дьарыктаах дьоһун ыал», «Ааҕар саха сайдам ыала», «Төрүт үгэс түмэр күүһэ», «Чөл туруктаах ыал», «Силистээх сис ыал», «Ыччат ыал тэрээһиннээх тиэргэнэ» уонна «Родные — любимые». Хас биирдии хайысхаҕа холобур буолар, бииртэн биир үтүө мааны ыаллар кэлэн, тус уопуттарын үллэһиннилэр.
Былаһааккалары улуус баһылыгын социальнай боппуруостарга солбуйааччы Мария Кронникова, улуустааөы култуура салалтатын начаалынньыга Петр Гуляев, улуустааҕы ЗАГС салайааччыта Анастасия Афанасьева, Чурапчытааҕы успуорт институтун преподавателэ Василий Лукин иилээн-саҕалаан ыыттылар. Экспердэринэн Социалистическай наука доктора Ульяна Винокурова, биллэр поэт, дьиэ кэргэн психолога Яна Байгожаева, педагогическай наука кандидата Светлана Гуляева уонна А.А.Саввин аатынан Чурапчытааҕы түмэл дириэктэрэ Афанасий Захаров буоллулар.
Мария Кронникова, улуус баһылыгын социальнай боппуруостарга солбуйааччы:
- Улуус баһылыга Степан Саргыдаев көҕүлээһининэн улууска үс сыллаах «Ыал саргыта» пилотнай бырагыраама ылыллан, 2024 сылга былааннаах үлэ оҥоһулунна. Ол курдук, быйыл кыбаартал аайы 13 индикатор (көрдөрүү) түмүгүнэн, араас дьаһаллары ыыттыбыт. Ол курдук, төрдүс кыбаарталбытын дьиэ кэргэн форумунан түмүктээтибит. Манна Ыал саргытын сылын чэрчитинэн ыыппыт алта куонкуруспут кыайыылаахтара кэлэн, иллээх-эйэлээх дьиэ кэргэн кистэлэҥэ туохха сытарын, оҕолорун хайдах ииппиттэрин, дьиэ кэргэнинэн туох үтүө үгэстээхтэрин олус истиҥник сэһэргээтилэр. Салгыы хас биирдии былаһааккаҕа билиҥҥи кэмҥэ турар кыһалҕалары туоратыыга санаа атастаһыыта буолла. Ырытыһыыга дириҥ хорутуулаах кэпсэтиилэр таҕыстылар. Ол түмүгүнэн түөрт хайысханан резолюция ылылынна. Манна улуустааҕы төрөппүт сүбэтэ эмиэ тус этиилэрин киллэрдэ. Резолюцияҕа нэһилиэньэ доруобуйата чөл туруктаах буоларыгар, эти-хааны чэбдигирдиигэ хас да сөптөөх этии киирдэ. Ону сэргэ демография тупсарыгар, оҕо төрөөһүнүн көрдөрүүтэ үрдүүрүгэр, дьиэ кэргэн бигэ тирэхтээх буоларыгар уонна элбэх оҕолоох ыалы өйүүр туһунан интэриэһинэй этиилэр киирдилэр. Маны таһынан эдэр көлүөнэни төрүт үгэстэргэ, сахалыы ыраастык саҥарарга иитэн-үөрэтэн таһаарарга, эдэр ыалы тыа сиригэр олохсутарга туһалаах этиилэр киирдилэр. Маны барытын сиһилии ырытан, былааҥҥа киллэрэн, хас биирдии нэһилиэги, тэрилтэлэри хабан былааннаах үлэ ыытыллыаҕа.
Форум үлэтин түмүгүнэн ылыллыбыт резолюцияны кыттааччылар 100% өйөөтүлэр.
Марфа Петрова.
