Бүгүҥҥү күҥҥэ, өрөспүүбүлүкэ үрдүнэн опекуннар уонна попечителлэр саамай элбэхтэр. Дьон үксүн аймахтарын оҕото тулаайах хааллаҕына, Оҕо дьиэтигэр биэримээри ылаллар. Өйүн туппут оҕо уруутун хайдах даҕаны ийэм-аҕам диэбэт, онон опекун диэн ааттанар.
Саха сиригэр департамент иһинэн Опекуннар уонна попечителлэр, Приемнай дьиэ кэргэттэр сүбэлэрин тэрийбиттэрэ балай эмэ ыраатта, кинилэр сүрүннээн күүс-көмө, тирэх буолаллар. Сокуоҥҥа уларыйыы, саҥа сүүрээн киирдэҕинэ, ону олоххо киллэрэргэ, тэрээһиннэри ыытарга өрүү көмөлөһөллөр.
Оттон бэҕэһээ, о.э кулун тутар 25 күнүгэр улуус дьаһалтатын мунньахтыыр саалатыгар ыытыллар сэминээргэ амарах дууһалаах, аһыныгас сүрэхтээх дьон муһуннулар. Тулаайах эбэтэр көрүүтэ-истиитэ суох хаалбыт кырачааннарга ийэни-аҕаны солбуйар аналлаах. Манна биир санаалаах, биир сыаллаах дьон мустан санаа атастаһалларыгар аналлаах тэрээһини улуустааҕы опека уонна попечительство отдела сыллата тэрийэн ыытар. Инники сылларга оҕону иитэ ылар дьиэ кэргэн ахсаанын хас да төгүл улаатыннарар улахан сорук күн бүгүнүгэр диэри сытыытык турар.
Сэминээр арыллыытыгар киирии тылы СӨ “Чурапчы улууһа” МО опека уонна попечительства отделын начаалынньыга Марианна Антипина эттэ: “Бүгүҥҥү күн туругунан Чурапчы улууһугар тулаайахсыйыы көрдөрүүтэ лаппа кыччаата ол курдук 2023 сыл түмүгүнэн 44 оҕо баар эбит буоллаҕына 2025 сыл түмүгүнэн 36 оҕо буолла. СӨ Ил Дархана Айсен Николаев 2030 сылга диэри тулаайах оҕо ахсаана үс төгүл аччыахтаах диэн кытаанах сыалы-соругу туруорбута, биһиги отделбыт бу хайысхаҕа күүскэ үлэлэһэр. Итини таһынан төрөппүт быраабын суутунан быстарыы ахсаана эмиэ кыччаата, ааспыт сылга 5 ыал бэйэлэрин олохторун үчүгэй өттүгэр тосту уларытаннар суутунан төттөрү төрөппүттэрин быраабын чөлүгэр түһэрдилэр. Оттон оҕолору дьиэлээһин өттүгэр этэр буоллахха манна бытаарыы баар, билиҥҥи туругунан 18 оҕо саҥа кыбартыыраларын кэтэһэ сылдьаллар”.
Салгыы “Россельхозбанк” салайааччыта Парасковья Захарова уонна
“Сбербанк России” салайааччыта Туяра Павлова оҕо харчытын уурунуу, түөкүттэртэн көмүскэллээх буолуу чааһыга,
Арассыыйа Социальнай пуондатын бэрэстэбиитэллэрэ Айаал Дьячковскай, Алена Никонова биэнсийэҕэ уларыйыылар, социальнай төлөбүр, биир кэмнээх оҕо босуобуйаларын тустарынан,
Прокопий Сокольников аатынан Чурапчытааҕы киин балыыһа педиатр-бырааһа Евдокия Карпова, 2025 сыл түмүгүнэн оҕолору диспансеризацияны ааһыыларын түмүктэрин,
психолог Надежда Попова улаатан эрэр оҕо кытары алтыһыы уратыларын,
Чурапчы улууһун 38-с нүөмэрдээх баһаарынай чаас сотруднига Андрей Эртюков уоттан сэрэхтээх буолууга итиэннэ АДПИ хайдах үлэлиирин,
Чурапчытааҕы полиция отделениетын саастарын ситэ туола илик оҕолор дьыалаларын иниспиэктэрэ, полиция младшай лейтенана Ньургуяна Прокопьева, буруйу оҥорууну утары профилактикалааһын,
саастарын ситэ туол илик оҕолору реабилитациялыыр киин үлэһитэ Наталия Софронова судаарыстыбаннай социальнай өҥөлөр,
опека уонна попечительства отделын исписэлиистэрэ олорор дьиэнэ хааччыйыы сэртэпикээттэрин, опекуннар отчуоттарын түмүгүн уонна киирбит ыйытыктарга хоруйдаатылар.
Сэминээр кыттыылаахтарын кытта оҕо иитиитигэр быһаччы ситимнээх исписэлиистэр үлэлэстилэр. Ханнык да үчүгэй үлэлээх оҕо дьиэтэ, дьиэ кэргэн сылаас сыһыанын солбуйбатын, онон сүрүн соругу толорууга бары түмсэн үлэ барыахтааҕын ыйдылар.
Сэмэн ЖЕНДРИНСКЭЙ. Ааптар хаартыскаҕа түһэриитэ