Быйыл улуус үрдүнэн 4 тыһыынча кэриҥэ үөрэнээччи оскуола боруогун атыллыаҕа, ону кытта маҥнайгы кылааска 288 оҕо киирэрэ былааннанар. Чурапчы нэһилиэгэр 75 оҕоҕо анаммыт «Кыталык» уһуйаан саҥа таас дьиэтэ үлэҕэ киириэҕэ. Мындаҕаайы нэһилиэгэр «Дьиэ кэргэн» национальнай бырайыак чэрчитинэн «Ымыы» уһуйааныгар 35 мөл. суумалаах хапытаалынай өрөмүөн ыытылынна.
Саҥа үөрэх дьылын көрсө икки оскуолаҕа уонна уһуйааҥҥа саҥа салайааччылар ананнылар. Ол курдук, Г.Д. Протодьяконов аатынан Алаҕар орто оскуолатыгар Герман Валерьянович Захаров дириэктэринэн, Д.Г. Барашков аатынан Бахсы орто оскуолатыгар Эрэл Васильевич Аммосов дириэктэринэн, П.И. Борисова аатынан «Улыбка» оҕону сайыннарар киинин — оҕо саадын салайааччытынан Алёна Леонидовна Архипова ананнылар.
Ааспыт үөрэх дьылын улахан ситиһиитинэн «Үөрэххэ уһулуччу ситиһиилэрин иһин» мэтээлинэн 28 оҕо бүтэриитэ буолар – 15 кыһыл көмүс мэтээл, 13 үрүҥ көмүс мэтээл. ЕГЭ түмүгүнэн Чурапчы гимназиятын 3 выпускнига муҥутуур 100 баалы ылан, 14 оҕо 80-99 баалы ылан үрдүк көрдөрүүнү ситистэ. Кинилэр бары улуус баһылыга олохтообут бириэмийэтин ыллылар (100 б.- 100 тыһ.; 80-99 б. – 50 тыһ.).
217 выпускниктарбыт ситиһиилээхтик туттарсан үөрэххэ киирдилэр, мантан 91-рэ үрдүк, 126 оҕо орто үөрэххэ. Маны сэргэ, Д.П. Коркин аатынан интэринээт-оскуола 15 оҕото үрдүк, 15 оҕото орто үөрэххэ киирдилэр. Быйыл уопсайа 11-с кылааһы 253, 9-с кылааһы 402 үөрэнээччи түмүктээтилэр. Тохсус кылааһы түмүктүүр сүрүн государственнай экзамеҥҥа 5 предмеккэ бастакытын муҥутуур баалы ылары 6 оҕо ситистэ.
Сайын устата 16 лааҕыр (күнүскү – 3; үлэ уонна сынньалаҥ лааҕыра – 7; балаакканан – 5; стационарнай – 1) уонна 7 оҕо былаһаакката 1258 оҕону хабан үлэлээтэ (ол иһигэр 53 АБДь кыттыылааҕын оҕото). Приморскай кыраай «Алые паруса» оҕо лааҕырыгар үөрэх уонна наука министерствотын квотатынан 10 анал байыаннай дьайыы кыттыылааҕын оҕото сынньанан кэллилэр.
Үөрэх-иитии хаамыытыгар доруобуйаны харыстыыр технологиялары киллэриигэ анаммыт өрөспүүбүлүкэ педагогтарын уонна уопсастыбаннаһын атырдьах ыйынааҕы сүбэ мунньаҕа буолан ааста. Мунньах биэс хайысханан ыытыллан, куттала суох үөрэх эйгэтин тэрийиигэ, оҕо эт-хаан, өй-санаа өттүнэн чэгиэн-чэбдик буолуутугар, үүнэр көлүөнэ доруобуйатын харыстааһыҥҥа, дьиэ кэргэн оруолун тула соруктаах кэпсэтиилэр ыытылыннылар. Ону тэҥэ үөрэх эйгэтин үлэһиттэрин чөл туруктарыгар, уһуйааччы быһыытынан уһун үйэлэниилэригэр болҕомто уурулунна. Маны сэргэ, оскуолаҕа аһылык хаачыстыбатыгар, саҥа санитарнай быраабылалары уонна нуормалары киллэриигэ үлэ барыаҕа.
Ю.П. Посельскай, үөрэх салалтатын начаалынньыга.