Чурапчы прокуратурата бу дьыл атырдьах ыйын 4 күнүгэр, “Чурапчы нэһилиэгэр” Тыа сирин түөлбэтин дьаһалатыгар чуолаан баһылык Владимир Дмитриевич Сивцев аатыгар, дьон-сэргэ олоҕор улахан хоромньуну таһаарар итэҕэстэри туоратарга анаан модьуйар суругу түһэрдэ.
Бэрэбиэркэ түмүгүнэн, “Чурапчы нэһилиэгэ” Тыа сирин түөлбэтин дьаһалтата бэйэтин территориятын иһигэр ууну-хаары ыытыы эбээһинэстэрин толорбото, ону ааһан ууну ыытар былаанын схемата төрүкү суоҕа, бигэргэтиллибитэҕэ быһаарылынна.
Маны таһынан ууну ыытыы үлэлэрэ ыытыллыбаттара, ол иһигэр олохтоохтортон “тиэргэннэригэр, оҕуруоттарыгар уу киирэн улахан хоромньуну оҥорбутун” туһунан сайабылыанньалары көрөн үлэлэспэттэрэ билиннэ. Нэһилиэк дьаһалтата болҕомтотун ууран кэмигэр ууну ыытыы үлэтин ыыппатаҕын түмүгэр, мустубут уу ыаллар тиэргэннэригэр итини сэргэ олохтоохтор күннэтэ хаамар, сылдьар уулуссаларын кытыыларынан туолан ууга барыыга тириэртэ.
Нэһилиэк иһигэр халаан уутун ыытар канализация суоҕа, күүстээх ардах кэнниттэн ууну ыытыы хонтуруолламмата, Чурапчы нэһилиэгин иһигэр бигэргэтиллибэтэх былаан-схема кэмигэр оҥоһуллубутаҕа — барыта бэдэрээлинэй сокуон ирдэбиллэрин улахан кэһиинэн ааҕыллар, итиэннэ нэһилиэк олохтоохторун бырааптарын күөмчүлээһиҥҥэ тэҥнэһэр.
Бэлэмнээтэ Сэмэн ЖЕНДРИНСКЭЙ