И.М.Павлов аатынан Чруапчы орто оскуолатыгар Билии күнүн бэлиэтээн, үөрүүлээх линейка буолла. Күммүт уота чаҕылыйан, таһырдьа сылыйан, оскуолаҕа оҕолор, төрөппүттэр киэргэнэн, үөрэ-көтө муһуннулар.
Бу оскуолаҕа саҥа үөрэх дьылыгар уопсайа 15 кылаас аһыллан, 285 оҕо үөрэнэ киирдэ. Олортон 25 оҕо оскуола боруогун аан маҥнай атыллаата, 11-с кылааһы 23 оҕо көрүстэ.
Үгэс быһыытынан, бастакы кылааска киирбит оҕолор маҥнайгы учууталларын Надежда Егорованы кытары сибэкки дьөрбөтүн туппутунан, сэлэлии хааман киирдилэр. Кырачааннарга оскуоланы бүтэрэр 11 кылаас үөрэнээччилэрэ баҕа санааларын тиэртилэр.
Үөрэх дьыла саҕаламмытын туоһулуур маҥнайгы алтан чуорааны тыаһатар чиэс маҥнайгы кылаас үөрэнээччитигэр Айталыына Дьячковскайаҕа уонна оскуола бастыҥ үөрэнээччитигэр Дамир Макаринскайга тигистэ.
Бу оскуола оҕону байыаннай-патриотическай тыыҥҥа иитиигэ улууска бастыҥнар ахсааннарыгар киирэр. Онон салгыы «Память» патриотическай кулууп иитиллээччилэрэ Дьулуур Попов, Дамир Карпов уонна Данил Попов Арасссыыйа, Саха сирин уонна Чурапчы улууһун былааҕын күөрэччи тутан киллэрдилэр.
Оскуола дириэктэрэ Николай Попов саҥа үөрэх дьыла саҕаламмытынан үөрэнээччилэри, төрөппүттэри уонна учууталлары эҕэрдэлээн туран, оскуола сайыҥҥы ситиһиитин билиһиннэрдэ. Ол курдук, быйыл бастакытын оскуола бэйэтин базатыгар байыаннай-патриотическай лааҕыр үлэлээбит. Биир сезоннаах лааҕыр икки сиринэн – Чурапчыга оскуола территориятыгар уонна Иван Михайлович Павлов төрөөбүт Мындаҕаайытыгар тэриллибит. Бу лааҕыр таһаарыылаахтык, ситиһиилээхтик үлэлээбитинэн сүүрбүт-көппүт үлэһиттэргэ Махтал суруктары туттарда.
Маны таһынан сылын аайы оскуолаттан 4-5 оҕо көрдүүр-чинчийэр бөлөххө кыттыһан, Новгородов уобалаһыгар үлэлээн кэлэллэр. Быйыл үлэлээбит, билиилэрин хаҥаппыт үөрэнээччилэргэ Максим Аммосовка, Дамир Сотников, Ньургун Захаровка, Миша Дьяконовка «Вахта Памяти-2025” сэртипикээттэри туттарда. Салгыы оскуола дириэктэрэ бастакы кылааска киирбит оҕолорго үөрэнээччи дневниктэрин бэлэхтээтэ.
Долгутуулаах бэлиэ түгэн уопсай хаартыскаҕа түһүүнэн түмүктэнэн, үөрэнээччилэр маҥнайгы уруоктарыгар тарҕастылар.
Марфа Петрова.
