Нэһилиэк дьаһалтатын үлэһиттэрэ эһиилги сыллааҕы былаан торумун бэлэмнииргэ ТОС салайааччыларын, түмсүү бэрэстэбиитэллэрин кытта көрсөн, кинилэр санааларын билистилэр, этиилэрин иһиттилэр.
Нэһилиэк баһылыга Владимир Сивцев үбүлөйдээх сылынан тэриллибит өрөспүүбүлүкэтээҕи хамыыһыйа былааныгар ылыллыбыт КСК тутуута, аспааллааһын, өрөмүөн үлэтэ уонна да атын үгүс бырайыак олоххо киирбитин бэлиэтээтэ. Мантан «Кыталык» уһуйаан тутуута быйыл кыаллыбатаҕын иһитиннэрдэ. Бу сылга дьон-сэргэ субуотунньуктарга, күрэхтэһиилэргэ, үтүө санаа ааксыйаларыгар көхтөөхтүк кыттыбыттарын эттэ.
Салгыы баһылык бастакы солбуйааччыта Уйгулан Туласынов Олохтоох көҕүлээһини өйүүр бырагырааманан, территориялары тупсаран оҥоруу курдук судаарыстыбаннай бырагыраамаларынан уулуссалары сырдатыы, тратуардары, суоллары оҥоруу, ырааһырдыы, Киин болуоссаты саҥатытан оҥоруу үлэлэрэ ыытыллыбыттарын сиһилии сырдатта.
Онтон баһылыгы социальнай боппуруостарга солбуйааччы Варвара Макарова култуура, успуорт эйгэтигэр сыллааҕы түмүгү иһитиннэрдэ.
Былаантан билиһиннэрдэххэ, тохсунньу ый бүтүүтэ КСК аһыллыаҕа. Баараҕай тутуу үлэҕэ киирдэҕинэ араас хабааннаах күрэхтэһиилэр, тэрээһиннэр ыытыллыахтара.
Арҕаа турар «Куоҕалы» ТОС сылтан сыл кэҥээн иһэринэн, ыаллар сөбүлээн олохсуйалларынан, «Куоҕалыны» икки тэҥ ТОС-ка араарыахтара. Санатан эттэххэ, бу ТОС-ка быйыл саҥа «Кэнчээри» түөлбэ эбиллэн биэрдэ. Маны сэргэ «Хаарбах туруктаах дьиэттэн көһүү» бырагырааманан элбэх кыбартыыралаах таас дьиэлэр тутуллан үлэҕэ киирбиттэрэ.
Мунньах бүтэһик боппуруоһунан үүнэр 2024 сылы туохха туһуламмыт сылынан биллэрэр туһунан кэпсэтиһии буолла. Дьаһал кыттыылаахтарыттан хас да этии киидэ. Ол курдук, Арассыыйаҕа Дьиэ кэргэн сылыгар сөп түбэһиннэрэн, Аҕа уонна уол оҕо сылынан эбэтэр Байыаннай дьайыы ыытылла турарынан эр киһи статуһун үрдэтэргэ Эр киһи сылынан аныахха сөбүн эттилэр. Ону таһынан түмсүүлэр бэрэстэбиитэллэрэ ырытыһыыга Успуорт, Чэбдигирии, Чөл турук сылларын биллэрэргэ санааларын үллэһиннилэр.
«Бу варианнар уонна мунньах хаамыытыгар турбут боппуруостар сиһилии үөрэтиллэн, бигэргэнэн, сөптөөх быһаарыылар ылыныахтара», — диэн баһылык Владимир Сивцев мунньаҕы түмүктээтэ.
Үүнэр сыл туохха ананара үгэскэ кубулуйбут 2023 сылы түмүктүүр тэрээһиҥҥэ биллэриллиэҕэ. Туһуламмыт сыл хайысхатыгар болҕомто ууруллан, туһааннаах бырагыраамалар ылыллан, үлэ-хамнас ыытыллыаҕа.
Марфа Петрова.