Чурапчы улууһугар дьон-сэргэ доруобуйатын көрүнэр, маассабай успуорду сэҥээрэр буолбута быданнаата, улууска нэһилиэнньэ 58,8% этин-сиинин чэбдигирдэр. Чурапчы – бу успуорт туоната!
Өрөспүүбүлүкэҕэ, чуолаан Чурапчы нэһилиэгэр араас көлүөнэ дьон хаалыктаах хаамыынан утумнаахтык дьарыктанар. Онуоха Чурапчы нэһилиэгин дьаһалтата кинилэри бары өттүнэн сылын аайы өйүүргэ кыһаллар.
Бу күннэргэ нэһилиэк дьаһалтата, хаамар, дьарыктанар дьоҥҥо анаан киэҥ-куоҥ суоллары хас даҕаны сиринэн астаран биэрдэ. Ол курдук олохтоохтор Куоҕалы эбэнэн, Ырыа Тумус искибиэр аннынан мусуойга диэри, “Молодежнай” ТОС-ка, Доҕордоһуу алааһыгар итиэннэ “Саҥа дэриэбинэ” томторунан туохтан даҕаны иҥнибэккэ, налыччы, көбүс-көнө суолунан хаамар, сүүрэр кыахтаннылар. Хас биирдии суол киирии тоҕойугар туһааннаах бэлиэлэр ыйаннылар.
“Күммүт уһаан, халлааммыт сырдаан – саас кэлэн иһэрэ тыа сиригэр ордук күүскэ биллэргэ дылы. Сотору кэминэн улаханныын-кыралыын бука бары таһырдьа кутуллан тахсыахпыт. Биһиги нэһилиэкпитигэр успуордунан утумнаахтык дьарыктанар кэскиллээх ыччаттардаахпыт, кинилэри сэргэ хас күн аайы сылайары билбэккэ күҥҥэ хастыыта эмэтэ хаамар, сүүрэр ытык кырдьаҕастар бааллар. Инньэ диэн туран дьоммутун-сэргэбитин бу оҥоһуллубут суолларынан бука бары тахсан хаамаргытыгар ыҥырабыт. Чурапчы күүһэ — түмсүүгэ”, — диэн Чурапчы нэһилиэгин социальнай боппуруостарга солбуйааччы Варвара Макарова кэпсээтэ.
Сэмэн Жендринскэй