Ханна да сытыы боппуруоһунан бэйдиэ сылдьар ыттар буолаллар. Бу аҕыйах хонуктааҕыта Борисов аатынан уулусса 26 нүөмэрдээх дьиэтин 1-кы куорпуһугар немецкэй овчарка боруодалаах ыт хас да күнү быһа киирэр кирилиэскэ сыппытын, олохтоохторго харгыстары үөскэппитин туһунан иһитиннэрии тарҕаммыта.
Уопсай дьиэ олохтооҕо Марфа Петрова Чурапчытааҕы полиция отделыгар төлөпүөннээн, тустаах үлэһиттэр тутатына кэлэн, ыты быстах кэмҥэ тутар пууҥҥа илдьэ барбыттара. Ыт ошейниктаах, ол аата хаһаайыннаах. Бэйдиэ сылдьар ыттар үгүстэрэ хаһаайыннаах буолаллара биллэр.
Бүгүн Чурапчы нэһилиэгин дьаһалтата, бэтэринээрийэ салалтата уонна полиция отдела дьиэ кыылларыгар эппиэтинэстээх сыһыаны олохтуур профилактическай рейдэни ыыттылар.
Нэһилиэк баһылыгын 1-кы солбуйааччыта Уйгулан Туласынов:
- Нэһилиэкпит “Молодежнай”, “Учууталлар”, “ДЭС”, “Киин” уонна “Куоҕалы” түөлбэлэригэр сырыттыбыт. Рейдэ түмүгүнэн 1 ыт быстах кэмнээх пууҥҥа киирдэ, 1 хаһаайыҥҥа сэрэтии уонна 2 административнай боротокуол толорулунна.
Уопсайа пууҥҥа 11 ыт уонна 2 ыт оҕото бааллар. Маннык профилакическай тэрээһиннэр нэдиэлэ аайы ыытыллыахтара, — диэн этэр.
Чурапчыбыт улууһун олохтоохторо, ыты, куосканы сөптөөхтүк сыһыаннаһан иитиҥ, дьоҥҥо-сэргэҕэ куттала суох эйгэни тэрийиҥ диэн ыҥырабыт.
Елена Макаринская