Бүгүн, балаҕан ыйын 7 күнүгэр Чурапчы нэһилиэгэр “Маарыкчаан” түөлбэҕэ сайыҥҥы уу ситимэ үлэҕэ киирдэ. Чурапчы сэлиэнньэтин баһылыга социальнай боппуруостарга солбуйааччы Варвара Макарова иһитиннэрбитинэн, “Олохтоох көҕүлээһиннэри өйүүр бырагыраамма” чэрчитинэн 110 ыалга уу ситимэ тиийдэ. Тэрийээччилэр Былатыан Ойуунускай аатынан уулусса 22 нүөмэрдээх дьиэ тиэргэнигэр Норуот көҕүлээһинин бырагырааматын чэрчитинэн сайыҥҥы уу ситимин киллэрэр үөрүүлээх тэрээһин сиэрин-туомун оҥордулар.
Сайыҥҥы уу ситимигэр өрөспүүбүлүкэ бүддьүөттүттэн субсидия көрүллүбүт. Маны таһынан, норуот көҕүлээһинин быраагыраматын куонкуруһун ирдэбилинэн олохтоох бүддьүөттэн эбии үп угуллубут.
Инньэ гынан өрөспүүбүлүкэтээҕи куонкуруска Леонид Варламов салайааччылаах “Периметр-сервис” ХЭТ кыайыылаах тахсан 3,5 биэрстэ уһуннаах уу турбатын: Артемьев, Октябрьскай, Орджоникидзе, Ойуунускай, Прокопьев, Пинигин, Трактовай, Ленин, Макаров аатынан уулуссаларга монтажтаан, олохтоохтор биир тыын боппуруостарын быһаардылар. Үлэ уопсай сууммата 2 мөлүйүөн 250 тыһыынча солкуобай сууммаҕа тэҥнэстэ.
Уу ситимин үөрүүлээх арыллыытыгар “Чурапчы улууһа” МТ баһылыгын бастакы солбуйааччыта Егор Сивцев,
“Чурапчы нэһилиэгин” МТ баһылыга Владимир Сивцев, “Периметр-сервис” ХЭТ салайааччыта Леонид Варламов,
“Маарыкчаан” ТОС бэрэссэдээтэлэ Лилиана Николаева, уопсастыбанньык, “Маарыкчаан” ТОС олохтооҕо, Чурапчы улууһун, нэһилиэгин Бочуоттаах олохтооҕо Иван Макаров кыттыыны ыллылар. Олохтоохтор ааттарыттанг харда тылы Петр Романов эттэ.
СӨ Үпкэ-аска министиэристибэтин пресс-сэкирээтэрэ Анна Чусовская иһитиннэрбитинэн, норуот көҕүлээһинин быраагырааматын чэрчитинэн кылгас кэм иһигэр Чурапчы нэһилиэгин сайдыытыгар туһуламмыт үгүс үлэ ыытыллыбыта. Ол курдук, 2018 сыллаахха Поликарп Барахсанов аатынан сынньалаҥ пааркатыгар оҕо этин-хаанын чэбдигирдэр “Ниндзя-квест” аттракцион арыллыбыта, ону таһынан Мурун Тыымпыйа түөлбэҕэ сайыҥҥы уу ситимэ уонна уулуссатааҕы уот холбоммута. 2019 сылга “Куоҕалы”, “Маарыкчаан”, “Спортивнай” түөлбэлэргэ 35 остуолба туран, уулусса уота холбоммута. 2020 сыллаахха киин уулуссаларга 450 м тратуар тэлгэммитэ, “Чараҥ” түөлбэҕэ 45 остуолбаны туруоран, уулусса уотун холбообуттара. Чурапчытааҕы киин баанньык саҥардыллан, олохтоохтору үөрдүбүтэ.
Ити курдук, чурапчылар Норуот көҕүлээһинин бырагырааматыгар көхтөөхтүк кытталлар.
Сэмэн Жендринскэй