Бүгүн Дьокуускай куоракка Юрий Гагарин аатынан култуура уонна ускуустуба киинигэр Култуура уонна духуобунай сайдыы министиэристибэтинр, Өрөспүүбүлүкэтээҕи норуот айымньытын дьиэтин тэрийиитинэн “Хон ааҕыылара” үһүс өрөспүүбүлүкэтээҕи методическэй-быраактыка кэмпириэнсийэтэ буолла.
Чурапчы улууһуттан култуура салалтатын салайааччыта Петр Гуляев аҕыс киһилээх дэлэгээссийэнэн кыттыыны ылла. Кэмпириэнсийэ иитинэн сиэксийэлэринэн үлэ уонна төгүрүк остуол ыытылынна.
Тэрээһин үөрүүлээх аһыллыытыгар Саха Өрөспүүбүлүкэтин култууратын миниистирэ Афанасий Ноев ыалдьыттаата, мустубут дьону эҕэрдэлээтэ.
Конференция түөрт хайысханан барда. Үһүс хайысхаҕа култуура эйгэтигэр коммерческайа суох тэрилтэлэртэн “Олоҥхо киинин” дириэктэрэ Дмитрий Попов бэйэтин үлэтин киэҥ араҥаҕа тарҕатта. Чурапчы улууһун нэһилиэктэригэр Олоҥхо ыһыахтара хайдах быһыылаахтык тэриллэн ыытыллалларын сырдатта.
Төрдүс хайысхаҕа 2026 сыллааҕы “Государственная поддержка лучших работников сельских учреждений культуры” күрэххэ Иван Винокуров аатынан оройуоннааҕы “Айылгы” норуот айымньытын дьиэтин массовай тэрээһиҥҥэ режиссёра Элеонора Дьяконова уонна Иван Кандинскай аатынан “Айыллаан” култуура киинин режиссёра Пётр Дьяконов бэйэлэрин сайаапкаларын хамыыһыйа иннигэр көмүскээтилэр. Эрдэтээҥҥи сылларга сайаапкалары кэтэхтэн көрүү буолар эбит буоллаҕына, быйылгыттан кыттааччылар бэйэлэрэ киирэн көмүскэнэр буолбуттар.
Бу курдук, сылга биирдэ ыытыллар өрөспүүбүлүкэтээҕи култуура үлэһиттэрин түһүлгэтигэр атыттары истэн-көрөн, бэйэ уопутун үллэстэн элбэҕи биллибит, ыллыбыт, биир идэлээхтэри кытары санаабытын атастастыбыт.
Маны тэҥэ, Иван Винокуров аатынан оройуоннааҕы “Айылгы” норуот айымньытын дьиэтин норуот айымньытын отделын салайааччыта Елена Дьячковская, «Ай» норуот устуудьуйатыттан Сусанна Дьячковская, Айылгы Муосчут кыыһа Пинигина Саха Өрөспүүбүлүкэтин норуоттарын дьыалаларын уонна тас сибээһи кытары Министиэристибэ тэрийбит IV-c `Экспортеры Якутии” кэмпириэнсийэҕэ кыттыыны ыла сылдьаллар.
Инникитин Чурапчы улууһун норуотун маастардарын, уран тарбахтаахтарын оҥоһуктарын тас дойдуга таһаарыыга тус былаан ылыллан үлэ барарыгар бастакы хардыылар оҥоһуллуохтара.
Мария Васильева, улуус култуураҕа управлениетын методиһа
Бэлэмнээтэ Сэмэн ЖЕНДРИНСКЭЙ