Бэс ыйын 8 күнүгэр хоп курдук хомуллан, сарсыарда эрдэ туран өрөспүүбүлүкэбит араас муннугуттан Өксөкүлээх Өлөксөй киинигэр тоҕуорустубут. Бастаан хомунуу, тэрээһин буолла: съезкэ сылдьа үөрэммиттэр улгум бэйэлээхтик коллекцияларын остуолга наардаан
тардан бүтэрэн кэбистилэр.
Быйылгы сылбыт Арассыыйаҕа Дьиэ кэргэн, Саха сиригэр Оҕо саас сыла биллэриллэн турар. Съезд тэрийээччилэрэ Надежда Усова, Андрей Шилов коллекционердарга олох эрдэттэн эмиэ бу тосхолу тутуһалларыгар ыйбыттара. Съезд кыттыылаахтара 2 этээһинэн толору турдулар. Туох туох суоҕай манна? Араас кыра оонньуур иһиттэн саҕалаан диафильм киинэтигэр тиийэ, бу кыракый кинигэлэр, значок арааһа, уруучукалар, хаҥкылар чахчы дьоллоох оҕо саас кэмин санатар… Бэл диэтэр Мэҥэ Хаҥаластан сылдьар Елизавета Прокопьевна дьэдьэн уобараһын толору биэрбитэ киһини сөхтөрөр: сэлээппэтиттэн саҕалаан туох баар иһитэ-хомуоһа барыта дьэдьэн ойуулаах, бэл саха поэттара, суруйааччылара минньигэс амтаннаах дьэдьэммитин хоһуйбуттар да эбит. Дьэ манна баар буолла араас атастаһыы, мэнэйдэһии, атыылаһыы.
Съезд биир уратытынан Уус Алдан «Умсулҕаннар» 30 сыллаах үбүлүөйдэрин бэлиэтээһин буолла (салайааччы Станислав Луковцев). Коллекционердартан саамай актыыбынай позициялаах Надежда Монастырева эрдэ почтаҕа үлэлии сылдьан туттубут «Морза» аппараата оонньуур быһыытынан атыыламмытын атыылаһан үөрдэ-көттө. Значоктаахтар даҕаны кыра, бытархай значоктарын сыа-сым курдук ууруннулар. Түмүккэ биһиги коллекционердарбыт өттүк харалаах, илии тутуурдаах барар чиэскэ тигистибит: ол курдук «Маарыкчааны» төрүттээбит биир тарбахха баттанар ытыктыыр коллекционербыт Иван Попов аата бастыҥнар кэккэлэригэр ааттанна, үрүҥ көмүс бэлиэни тутта. Салгыы Анастасия Дьячковская, Марфа Дьячковская, Надежда Монастырева, Надежда Захарова, Раиса Федорова, Семён Иванов, Дария Федорова, Екатерина Андреева уонна Мотрена Никитина дипломунан наҕараадаланан үөрүүбүт үксээтэ. Инникитин да өссө киэҥ былааннаахтык үлэлиир баҕалаах, доҕотторбутугар «Аныгыс көрсүөххэ диэри» дэһэн тарҕастыбыт.
Октябрина Сивцева