Чурапчы килбэйэр киинигэр, урукку «Престиж» маҕаһыын дьиэтигэр «Күнтэгил» маҕаһыын филиала үөрүүлээхтик аһылынна.
Бэлиэтээн эттэххэ, «Күнтэгил» маҕаһыын Чурапчы нэһилиэгэр 2013 сыллаахтан тэриллэн таһаарыылаахтык үлэлиир. Аан бастаан сахалыы иһит атыыланар буоллаҕына, күн бүгүн сонун, хаачыстыбалаах табаардарынан үгүс атыылаһааччылары үөрдэр. Маҕаһыыны аныгылыы көрүүлээх эдэр ийэлэр Виктория Чикачева-Попова уонна Жанна Егорова салайан үлэлэтэллэр. Кинилэр улууска, нэһилиэккэ ыытыллар тэрээһиннэргэ спонсор быһыытынан үгүстүк кытталлар.
Виктория Чикачева – Попова, урбаанньыт:
— Дьокуускайга «Ректайм” хампаанньаҕа үлэлии олорон, сахалыы тыыннаах маҕаһыыммын арыйбытым. Аатын өр толкуйдуу барбатаҕым. Күнтэгил диэн оҕо аатын истэн баран, тута сөбүлээбитим. Суолтата — «күҥҥэ тэҥнээх”. Бу ааты Саха сиригэр биллэр ырыаһыт Анатолий Бурнашев айбыта. Ол иһин киниттэн көҥүл ылан, маҕаһыыммар иҥэрбитим. Үлэлээн барбытым кэнниттэн, маҕаһыыным табаарын эргийиитэ улаатан, соҕотох салайар киһиэхэ ноҕоруускалаах буолбута. 2020 сыллаахха, оруобуна пандемия кэмигэр Жанналыын билсиһэн, үлэҕэ ыҥырбытым. Саҥа үлэһитим түргэн туттунуулааҕын, сонун идиэйэлэрдээҕин, олоххо көрүүбүт майгыннаһарын бэлиэтии көрөн, маҕаһыыны кыттыһан салайарга этии киллэрбитим. Жанна түргэнник сөбүлэһэн, күн бүгүҥҥэ диэри тапсан бииргэ үлэлии сылдьабыт. Онтон бу саҥа филиалбытыгар үһүс киһинэн бэйэбит үөрэтэн, такайан таһаарбыт Машабыт кыттыста. Кини биһиэхэ устудьуоннуу сылдьан, быстах кэмҥэ атыыһытынан үлэҕэ киирбитэ. Оччолорго Маша Кытай тылын үөрэтэрэ. Коронавирус ыарыыта тарҕанан, Кытайга кыайан үөрэнэ барбатаҕа, биһиги дьолбутугар (үөрэр). Ол иһин салгыы үлэлии хаалбыта. Маша Кытайдыы холкутук билэр, саҥарар буолан, табаардарбытын быһалыы Кытайтан атыылаһан ылааччынан үлэлээбитэ, үлэлиир даҕаны. Кыргыттарбар, үлэһиттэрбэр махтанабын. Маҕаһыыммытын кытта тэҥҥэ бэйэбит эмиэ сайдан, уопутуран иһэбит.
Саҥа маҕаһыын аанын тэлэччи аһар кэрэ бэлиэ түгэнинэн айхаллаан, алгыс тылын анаан, аал уоту оттон, айах тутан, сахалыы сиэри-туому Валентина Иустинова толордо. Салгыы аалай лиэнтэни үөрүүлээх быһыыга-майгыга маҕаһыын хаһаайкалара үһүөн быстылар.
Маҕаһыын «Күнтэгил күндү бэлэх» диэн сүрэхтэннэ. Бу туһунан урбаанньыт Жанна Егорова билиһиннэрдэ:
— «Күнтэгил» сыаннаһа дьиэ кэргэҥҥэ сытар. Дьиэ кэргэн иллээх-эйэлээх буоллаҕына, киһи кыаллыбаты да кыайар, санаабыта да табыллан иһэр дии саныыбыт. Ийэттэн дьиэ кэргэн эйгэтэ олус тутулуктаах. Онон маҕаһыыннарбытыгар дьиэ ис бараанын киэргэтэр уонна кэрэ сэбэрэни тупсарар табаардар атыыланаллар. Манна эбии, хайысхабытын кэҥэтэн, саҥа филиалбытыгар бэлэх оҥорорго сөптөөх табаардары атыыга таһаардыбыт. Ол иһин «Күнтэгил күндү бэлэх» диэн ааттаатыбыт. Онон истиҥник саныыр чугас дьоҥҥут суолталаах түгэннэригэр «Күнтэгил» маҕаһыынтан бэртээхэй бэлэхтэри булан, бэлэх уунан үөрдүҥ диэн ыҥырабыт.
Үөрүүлээх түгэнинэн ыҥырыылаах ыалдьыттар, урбаанньыт кыргыттар аймахтара, дьүөгэлэрэ эҕэрдэлээн туран, алгыстаах санааларын эттилэр.
Олох тэтиминэн дьон наадыйыыта уларыйан иһэр. Ол иһин атыылаһааччылар интэриэстэрин учуоттаан, ырытан, онно сөп түбэһиннэрэн маҕаһыыҥҥа саҥаттан саҥа көрүҥ табаардар кэлэллэр. Онуоха маҕаһыын хаһаайкалара билиҥҥи кэмҥэ үгүс кэрэ аҥаар ымсыырар аныгы тиэхиньикэлэрин — дьиэ ис үлэтин чэпчэтэр аныгы пылесоһу уонна аһы түргэнник буһарар аэрогрили үлэлэтэн көрдөрдүлэр. Кырдьык да, туһалаах табаардар буолалларын бигэргэттилэр. Атыылаһааччылар сэргээн, сиһилии ыйыталаһан биэрдилэр.
Бу күн кэлбит дьон-сэргэ арт-терапия дьарыгын нөҥүө маҕаһыын үүнэ, сайда, кэҥээн иһэригэр баҕа санааларын суруйан хааллардылар.
«Күнтэгил» саҥа маҕаһыына ситиһиилээхтик үлэлииригэр, элбэх махталлаах атыылаһааччылаах буоларыгар баҕарабыт.
Марфа Петрова.