Өрөспүүбүлүкэҕэ Үлэ, улууска Ытыктабыл сылынан «Дьоло — дьону үөрдүүгэ» диэн ССРС култууратын туйгунун, Саха АССР култууратын үтүөлээх үлэһитин, Чурапчы улууһун уонна нэһилиэгин Бочуоттаах олохтооҕун Надежда Заболоцкаяны кытары истиҥ көрсүһүү ыытылынна.
Тэрээһиҥҥэ улуус уонна Чурапчы нэһилиэгин бэтэрээннэрин Сэбиэтин бэрэссэдээтэллэрэ Матрена Матвеева уонна Мария Матвеева, улуустааҕы култуура салалтатын начаалынньыгын солбуйааччы Айталина Смирникова уонна Надежда Михайловна айар үлэтин сэҥээрээччилэр, кинини кытта алтыспыт биир үөлээннээхтэрэ, култуура үлэһиттэрэ кытыннылар.
Тэрээһини бибилэтиэкэ үлэһитэ Римма Петрова иилээн-саҕалаан ыытта. Кини ыйытыыларыгар эппиэттээн, ыҥырыылаах ыалдьыт хантан төрүттээҕин, айар үлэҕэ хаһан үктэммитин туһунан кэлбит дьоҥҥо бэрт сэргэхтик кэпсээтэ. Ол курдук, Надежда Михайловна түөрт Арассыыйа дьоруойа тахсыбыт Уус Алдан Тандатыттан төрүттээх эбит. Бу нэһилиэккэ Мария Андреевна Герасимова дипломнай үлэтин көмүскии тиийэ сылдьан, Надежда Заболоцкаяны бэлиэтии көрөн, киниэхэ барсар оруолун толотторбут. Онуоха олус үчүгэйдик оонньоон көрөөччүлэри сөхтөрбүт, дьон сэҥээриитин ылбыт. Надежданы култуура үнүстүүтүгэр туттарсарга Мария Андреевна сүбэлээбит.
Салгыы Надежда Михайловна режиссер быһыытынан үлэлээбитин, көрүдьүөстээх түгэннэрин, «Арчы» дьиэтигэр үлэлээбитин кэпсээтэ. Кини уопсайа 41 испэктээги туруорбут уонна ааҕан сиппэт элбэх сценарийы суруйбут.
Надежда Михайловна 50 сыл устата араас испэктээктэргэ араас оруолларга итэҕэтиилээхтик оонньоон, элбэх көрөөччүнү төһөлөөх үөрдүбүтэ-котүппүтэ, ытаппыта-соҥоппута буолуой? Бу туһунан итиэннэ Надежда Заболоцкаяны кытта алтыспыт үтүө кэмнэрин тэрээһиҥҥэ кэлбит дьон истиҥник ахтан-санаан ыллылар.
ССРС култууратын туйгуна, улуус ытык кырдьаҕаһа Василий Дьячковскай:
Киин бибилэтиэкэ саалатыгар олус үчүгэй, истиҥ көрсүһүү буолла. Надежда Михайловна 1976 сыллаахтан Чурапчыга олохсуйан, таһаарыылаахтык үлэлээн, оройуон сайдыытыгар улахан үтүөлээх, өҥөлөөх киһи быһыытынан сыаналыыбын. Кини кэлиэҕиттэн Чурапчы улууһун култууратын эйгэтигэр элбэх исписэлиис, каадыр үлэлээн аастылар. Кинилэри үөрэтиигэ, уһуйууга Наджеда Михайловна үлэлэһэн кэллэ. Саҥа талааннары, дьоҕурдаах артыыстары иитэн-үөрэтэн таһаарда. Ити курдук, Надежда Михайловна Чурапчыны иккис дойду оҥостон, улууспут култууратын сайдыытыгар күн бүгүҥҥэ диэри тус кылаатын киллэрсэр. Дьон махталын, тапталын ылыан ылар.
Надежда Заболоцкая чахчы бэйэтин идэтин толору баһылаан, култуура эйгэтигэр бэриниилээхтик үлэлээн, дьон сыанабылын ылара бу күн өссө төгүл бигэргэннэ.
Марфа Петрова.
