“Биһиги дойдубутугар психотропнай сэбилэниигэ үлэ ыытыллыбыта дуу, суох дуу?” – диэн ис хоһоонноох кэпсэтии киин бэчээтинэн хас да төгүл көбүтүллүбүтэ. Ол эрээри, хомойуох иһин, ити суруйуулар туох да түмүгэ суох хаалан испиттэрэ.
Кэмниэ-кэнэҕэс онуоха сыһыаннаах полковник Пышенко “Рабочая трибуна” хаһыат нөҥүө аһаҕастык билиммитэ: кырдьык, холоммуппут, психотропнай генератордары аргыстар көмөлөрүнэн үөһэ таһааран баран, онтон “өстөөх” тыыннаах күүһэ түмсүбүт сиригэр сардаҥалары чопчу ыытан суоһарыахтаах этибит. Бу идея биһиги да, арҕааҥы да аргыстар улахан эрэлэ суохтарынан олоххо кыайан киирбэтэх. Быһата, күн мэһэйдээбит: кини эмискэ күүстээхтик тыгар сардаҥалара космическай тиэхэньикэ аҥарыгар тиийэ саахалланыытыгар тиэрдиэхтэрин сөп, оччотугар ол айыллыбыт тэргэн бэйэ территориятыгар, Кремль эбэтэр Үрүҥ дьиэ диэн араарбакка, “ыалдьыттаатаҕына” көҥүлэ. Онтон ытырыктаппыт буолуохтарын сөп.
Оттон дьиҥ олоххо итинник уопуттар оҥоһуллубуттара, арбыытаҕа сардаҥаларынан ытыалыыр аргыстар таһаарыллыбыттара дуо? Биллибэт, ол эрээри… Дьокуускайга олорбут психотреапевт-быраас Д.Д. Софронов Чурапчы оройуонугар 70-с сылларга 12 киһи ханнык ыарыыттан буолара биллибэккэ соһумардык өлбүттэрин туһунан манныгы кэпсээбит. Кини өрөспүүбүлүкэ Доруобуйа харыстабылыгар министиэристибэтэ тэрийбит хамыыһыйатыгар киирсэн быһылаан тахсыбыт сиригэр барса сылдьыбыт, эспертиизэҕэ кыттыбыт уонна ол түмүгүнэн бэйэтин көрүүтүн суруйбутун “үөһээҥилэр” биһирээбэтэхтэр. Быраас бэйэтин көрүүлэниитин туһунан 25 сыл устата кимиэхэ да кэпсиэ суох буолан тылын биэрбит. Ити кэмтэн балтараа сыл буолан баран Москубаттан ГКСБК (КГБ) үлэһитэ кэлэн кэпсэппит уонна эрэннэриитин умнубатыгар көрдөспүт.
Онтон сиэттэрэн Софронов төбөтүгэр туох санаа киирбитэй? Ону биһи бэлиэтээһиммит саҕаланыытыгар таарыйан ааспыппыт. Кини ити иэдээҥҥэ түбэспиттэртэн тыыннаах хаалбыт икки киһини көрсүбүт. Кинилэртэн биирдэстэрин кэпсээнинэн сирдэттэххэ, өлөн эрээччилэри киһи тулуйбат ынырык тыас-уус уонна саҥа-иҥэ галлюцинациялара муҥнууллара үһү. Софронов ити дьон күүстээх психотропнай дьайыыга түбэспиттэр диэн сабаҕалаабыт. Космостан эбэтэр ханнык эрэ көтөр аппарааттан “сардаҥа” соһуччу көҥү көтөн тахсыбыт буолуоҕар сөп курдук. Дойду территориятыгар маннык хас да “туочука” баара эбэтэр түбэлтэ аан бастаан буолбатаҕа сэрэйиллэр. Ол да иһин ГКСБК үлэһиттэрэ, дьыала ис дьиҥин билэр буоланнар, чуолкайдык үлэлээтэхтэрэ: хамыыһыйа чилиэннэригэр – быраастарга өлбүт дьон ыарыыларын устуоруйатын сорох илиистэрин эрэ ааҕалларын көҥүллээбиттэрэ, оттон хааннарыттан, эттэриттэн-тириилэриттэн ылыллыбыт анаалыстары Москубаҕа бэйэлэрэ илдьэ барбыттара.
Дмитрий Дмитриевич Софронов илии баттаабыт болдьоҕо ааһан, бу туһунан аномальнай уонна биллибэт көстүүлэринэн интэриэһиргиир биир дойдулаахтарыгар 1995 сыллаахха кэпсээн хаалларбыт.
Биллэн турар, Дмитрий Софронов сабаҕалааһына биир саамай боччумнаахтара эрээри, “Чурапчы иэдээнин” туһунан соҕотох версия буолбатах. Биһиги планетабытыгар кэмиттэн-кэмигэр чопчу биирдиилээн уһаайбаларга, фермаларга дьон уонна сүөһүлэр соһумар биллибэт иэдээнтэн өлө тураллар. Учуонайдар маны геофизическай аномальнай зоналарга эмискэ үөскүүр эбэтэр сиртэн тахсар алдьатыылаах сардаҥаларынан уонна хонууларынан быһаарарга холоноллор.
Сэмэн ЖЕНДРИНСКЭЙ