Буойун-учуутал Степан Кузьмич Макаров аатын сүгэр Чурапчы гимназиятыгар тиһэх чуораан чугдаарда. Бырааһынньык күн төһө да ардахтаах, тымныы күн турдар, гимназия үөрбүт-көппүт дьону-сэргэни, оҕону-аймаҕы түмтэ.
Быйыл бу үөрэх кыһатын 11-с «а», «б» кылаастарын 40 оҕо бүтэрэн, олох киэҥ аартыгар үктэнэр. Кинилэр ортолоругар 11 үөрэнээччи кыһыл уонна үрүҥ көмүс мэтээлгэ үлэлэһэллэр. Кылаас салайааччыларынан үрдүк категориялаах учууталлар Александра Куличкина, Николай Романов буолаллар. Маны тэҥэ 9-с «а», «б» кылаастары 48 оҕо ситиһиилээхтик бүтэрдилэр.
Үөрүүлээх линиэйкэ дойду уонна өрөспүүбүлүкэ былааҕын күөрэччи тутан киириинэн саҕаланна. Үөрэнээччилэри долгутуулаах бэлиэ түгэнинэн оскуола дириэктэрэ Юрий Слепцов эҕэрдэлээн туран, тус этиитигэр бэлиэтээтэ:
— Быйылгы үөрэх дьылыгар олимпиадаларга үрдүк көрдөрүүлэри ситистибит. Бүтүн Арассыыйатааҕы, өрөспүүбүлүкэтээҕи таһымҥа 14 үөрэнээччи призер уонна муҥутуур кыайыылаах аатын ылла. Ол иһигэр үс үөрэнээччи өрөспүүбүлүкэҕэ ыытыллыбыт олимпиадаҕа бастакы миэстэлэри ыллылар: физкултуураҕа Ваня Лукин, информатикаҕа Алеша Дьяконов уонна ОБЗР предметигэр Саргылана Богдокумова. Башкирияҕа паралингвальнай олимпиадаҕа гимназия үһүс сылын кытынна, быйыл Амина Макарова призер аатын ылла. СӨ бастакы Бэрэсидьиэнин оскуолаларын ситимин икки ардыларыгар ыытыллар үөрэххэ дьоҕурдаах оҕолор олимпиадаларыгар Чурапчы гимназиятын хамаандата быйыл кыайыылаах аатын ылары ситистибит. Маны сэргэ үөрэнээччилэрбит сыллата научнай-практическай кэмпириэнсийэлэргэ ситиһиилээхтик кытталлар. Бүтүн Арассыыйатааҕы кэмпириэнсийэлэргэ 13 оҕобут кыайыылаах уонна призер буоллулар.
Салгыы улуус баһылыга Степан Саргыдаев, нэһилиэк баһылыгын социальнай боппуруостарга солбуйааччы Варвара Макарова уонна улуустааҕы үөрэх салалтатын начаалынньыга Юрий Посельскай эҕэрдэлээтилэр.
11-с кылаастар үгэскэ кубулуйбут вальс намыын муусукатыгар уйдаран үҥкүүлээтилэр. Ол кэнниттэн хас биирдии педагогу эҕэрдэлээтилэр, өйдөбүнньүк бэлэхтэри туттардылар. Кинилэри үөрэппит, такайбыт учууталлара тус наҕараадаларын – «Признание учителей» анал ааты Сардана Старостинаҕа, Иван Лукиҥҥа туттардылар. Ону сэргэ гимназия бэтэрээннэрин Ытык сүбэтин бириэмийэтэ Ньургуйаана Егороваҕа, Айлина Сивцеваҕа, Айсана Куо Сивцеваҕа уонна «Оскуола интернатын бастыҥ иитиллээччитэ” анал аат Петр Пермяковка туттарылыннылар.
Бу күн оскуола үрдүк көрдөрүүлээх үөрэнээччилэригэр, бастыҥ актыбыыстарыгар улуус, нэһилиэк наҕараадаларын, тэрилтэлэр, уопсастыбаннай түмсүүлэр олохтообут бириэмийэлэрин туттардылар.
Буойун-учуутал Степан Кузьмич Макаров аатынан стипендияны сиэн-быраата Иван Макаров 11 «б» кылаас үөрэнээччитигэр Кристина Куличкинаҕа туттарда.
Быйылгы выпускниктарга ситиһиилэр, дьоллоох түгэннэр тосхойо туралларыгар баҕарабыт.
Марфа Петрова.