Саха Өрөспүүбүлүкэтэ 2021 сыллаахха сахаттан бастакынан Социалистическай Үлэ Дьоруойун үрдүк аатын ылбыт Роман Иннокентьевич Константинов төрөөбүтэ 125 сылын үрдүк таһымҥа бэлиэтээбитэ.
Роман Константинов 1896 сыллаахха алтынньы 14 күнүгэр Боотуруускай (Чурапчы) улууһун I Болугур нэһилиэгэр төрөөбүтэ. 1933 сылтан холкуоска сылгыһытынан, сылгы пиэрмэтин сэбиэдиссэйинэн үлэлээбитэ. Холкуос сылгытын ахсаана 168 % элбиирин, төрүөҕү ылыы 100 % буоларын ситиспитэ. 1947 сыллаахха 55 биэттэн 55 кулуну ылан, 1948 сыллаахха ССРС Үрдүк Сэбиэтин Президиумун ыйааҕынан, сахаттан бастакынан Социалистическай Үлэ Дьоруойа буолбута. Ленин уордьанынан иккитэ наҕараадаламмыта, Чурапчы улууһун Бочуоттаах олохтооҕо буолбута, 1949—1958 сс. Саха АССР Үрдүкү Сэбиэтин дьокутаатынан талыллыбыта. Биир дойдулаахтара кининэн киэн тутталлар. Болугур нэһилиэгин Амма орто оскуолата 2003 сылтан Роман Иннокентьевич Константинов аатын сүгэр.
Санатан эттэххэ 2021 сылга өрөспүүбүлүкэтээҕи Сылгыһыт күнэ Чурапчы улууһугар Социалистическай Үлэ Дьоруойа Роман Константинов төрөөбүтэ 125 сылын чэрчитинэн ыытыллыбыта, «Мындаҕаайы – мин кэрэ дойдум» кинигэ, Роман Константинов олоҕор-дьаһаҕар, үлэтигэр-хамнаһыгар анаммыт хаартыска альбома тахсыбыта уонна урут тахсыбыт «Дьоруой Арамаан» кинигэ хос бэчээттэммитэ. Ону таһынан Дьоруой пааматынньыгын таһыгар тупсаҕай көрүҥнээх искибиэр оҥоһуллуллубута, «Сырдык» хомууна 100 сылынан пааматынньык туруоруллубута, Болугур нэһилиэгин Мындаҕаайы бөһүөлэгэр тупсаран оҥорууга элбэх үлэ ыытыллыбыта.
Сэмэн ЖЕНДРИНСКЭЙ