Күөх кырсыгар күөлэһитэн,
Кырабыттан үлэлэтэн,
Мөҕөн-таптаан, миигин бачча
Киһи гыммыт баар — Чурапчы.
Дьуон Дьаҥылы тыллара
Бүгүн, Чурапчы нэһилиэгин олохтоохторо, ыалдьыттара төрөөбүт бөһүөлэктэрин 376 сылын бэлиэтииллэр. Сарсыарда 10 чаастан саҕалаан Поликарп Барахсанов аатынан сынньалаҥ пааркатыгар дьон-сэргэ тоҕуоруһа муһунна, сүргэлэрэ көтөҕүллэн үөрдүлэр-көттүлэр.
Бу күн, Чурапчы нэһилиэгин инники кэскилин түстүүр, баһылыгы талыы быыбара ыытылла турар. Итинэн сиэттэрэн олохтоохтор бырааһынньыктыы тахсыылара маассабай буолла. Паарка килбэйэр киинигэр кэнсиэрт тэрилиннэ, урбаанньыттар итиэннэ чааһынай дьоннор күһүҥҥү оҕуруот аһын, бэйэлэрэ оҥорон таһаарбыт бородууксуйаларын хамаҕатык атыылаатылар.
Тэрээһин үөрүүлээх чааһыгар “Чурапчы улууһа” МТ баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, “Чурапчы нэһилиэгэ” МТ баһылыга Владимир Сивцев, нэһилиэк дьокутааттарын Сэбиэтин бэрэссэдээтэлэ Василий Гуляев, СӨ Ил Түмэнин дьокутаата, Олимпийскай чөмпүйүөн Павел Пинигин бу бэлиэ күнүнэн эҕэрдэлээтэ, нэһилиэк олоҕор-дьаһаҕар көхтөөхтүк кыттар уопсастыбанньыктарга, ТОС салайааччыларыгар наҕараадалары туттардылар.
Бырааһынньык кэмигэр баҕалаах дьон, анал байыаннай дьайыыга сылдьар байыастарга анаан хаххалыыр сиэккэни өрдүлэр.
Күн иккис аҥарыгар “Эрдии-2024” эр дьон икки ардыгар тыынан, салгын саанан ытыыга күрэхтэһии буола турар, манна Дьокуускай куораттан, Мэҥэ Хаҥаластан тиийэ кыттааччылар муһуннулар, тыҥааһыннаах киирсиилэри Лааһарап муостатын кытыытыттан туран эрэ кэтээн көрүөххүтүн сөп.
Мантан киэһэ олохтоохторго анаан эстрада сулустара кыттыылаах эҕэрдэ кэнсиэрт буолара күүтүллэр.
Онон бүгүн чахчы да Чурапчы күнэ! Мантан улахан суруйааччылар үөскээбиттэрэ! Манна Улуу тириэньэр Дмитрий Коркин үлэлээбитэ! Манна Олимпийскай чөмпүйүөннэр уһаарыллыбыттара! Манна бастакы СӨ Ил Дархана Егор Борисов төрөөбүтэ! Манна тыа сиригэр бастакы үрдүкү үөрэх кыһата тэриллибитэ! Биһиги модун Дойдубутунан, киэҥ-нэлэн Сахабыт сиринэн, төрөөбүт Чурапчыбытынан киэн туттабыт! Чурапчыбытын таптыыбыт!
Сэмэн Жендринскэй. Ааптар хаартыскаҕа түһэриитэ