Күн турбутун былдьаһа, бу күннэргэ үрүҥ үүтү үрүлүтээччилэр, эмис эти дэлэтээччилэр окко киирдилэр. Болтоҥоҕо Слепцовтар номнуо бастакы алаастарыгар үлэ күөстүү оргуйар. Улуус баһылыга Степан Саргыдаев отчуттары көрсөн, ирэ-хоро кэпсэттэ. Слепцовтар да баһылык бэйэтэ маннык кэрийэн көрсөрүн, ыйыталаһарын астыннылар, хайҕаатылар, бэйэлэрин санааларын эттилэр.
Ыал аҕа баһылыга Максим Романович Слепцов маннык кэпсиир:
- Тыа сирин ыалын быһыытынан сүөһү, сылгы көрөбүт. Быйыл 20 төбөнү кыстаттыбыт, ыанар ынахпыт 6. Былырыын 3 кур оппор эбии 18-һы оттообутум, онтукпуттан 4 ордон турар. Быйыл сыл тахсар оппун булар инибин, алаастар үүммүттэр эрээри үксэ уу, онон күһүн уута тартаҕына эмиэ оттуохпут.
Биһи дьиэ кэргэнинэн оттуубут. Балтым Мария Романовна, быраатым Юрий Михайлович сүөһүлэрин көрөбүт. Онон кинилэр окко хайаан да тахсан көмөлөһөллөр. Оҕолуун-улаханныын 10-ча буолабыт. Мин илиинэн оттуурбун сөбүлүүбүн. От оннукка үчүгэйдик куурар, хаачыстыбалаах буолар.
Максим Романович сиэннэр улаатыахтарыгар диэри өссө да сүөһү көрбүт киһи диэн баҕа санаалаах. Сайынын ынахтарын ыан, арыы оҥорон атыылыыллар. Күһүн балаҕан ыйыгар үлэҕэ тахсыы буоллаҕына, ньирэйдэр улааттыннар диэн кыстыкка диэри ыыталлар.
Елена Макаринская