Кулун тутар 19 күнүгэр Болтоҥо нэһилиэгин оскуолатыгар Саха Өрөспүүбүлүкэтин биллиилээх судаарыстыбаннай диэйэтэлэ, номоххо киирбит кыһыл хамандыыр, чекист, Саха сирин Киин Ситэриилээх кэмитиэтин бэрэссэдээтэлин солбуйааччы, Саха сиринээҕи доруобуйа харыстабылын наруодунай комиссара Николай Дмитриевич Кривошапкин – Уот Субуруускай 130 сылыгар туһуламмыт «Сугулаан-2026» ыччат форума үрдүк таһымҥа ыытылынна. Форум Чурапчы улууһун баһылыга Степан Саргыдаев, СӨ Ыччат дьыалатыгар уонна социальнай коммуникацияларга миниистирэ Петр Шамаев, СӨ Инновация миниистирэ Петр Николаев уонна СӨ общественнай палататын өйөбүллэринэн ыытылынна.
Манна улууспут нэһилиэктэриттэн эдэр, кэскиллээх ыччат лидердэрэ, оскуола улахан кылааһын үөрэнээччилэрэ, актыбыыстара, араас үөрэх тэрилтэлэриттэн устудьуоннара, ону тэҥэ Өрөспүүбүлүкэбит килбэйэр кииниттэн, Дьокуускай куораттан экспертэр кэлэн кыттыыны ыллылар.Ол курдук, «СмартОм: ИТ сыһыарыылары уонна сайтары айан оҥорор» хампаанньа генеральнай дириэктэрэ Максим Михайлов, АКУИККИ преподавателэ, «Суруйааччылар алаастарынан» уонна «Урбаанньыттар алаастарынан» маршруттар ааптардара Александр Протодьяконов, «Steam, VK play платформаҕа компьютернай оонньуулары айан оҥорор Криолит геймс» хампаанньа салайааччыта Валерий Крупеньков, Чурапчы улууһун баһылыгын социальнай боппуруостарга солбуйааччы Мария Кронникова, Н.Д. Субуруускай аатынан Болтоҥо орто оскуолатын дириэктэрэ Владислав Скрябин , Чурапчы улууһун үөрэҕин салалтатын отдел начаалынньыга Лилия Пермякова, “Чурапчы улууһун олохтоох көҕүлээһини сайыннарар агентство” үлэһитэ Саргылана Старостина.
Кэлбит ыччаттар 8 хамаандаҕа арахсан, куратордар ананнылар. Кыттааччыларга Чурапчы (ЦСППЕИМ, гимназия, Хатылы, «Березка» уһуйаан ) психологтара биир сомоҕо буоларга араас оонньуулары, трениннары ыыттылар.
Хамаандалар талан ылбыт тиэмэлэригэр креативнай экономикаҕа сыһыаннаах бырайыактары оҥордулар, экспертэр иннилэригэр көмүскээтилэр.
Түмүккэ 3 хамаанда кыайыылааҕынан тахсан наҕараадаланнылар, ону тэҥэ анал ааттар туттарылыннылар. Сандаара Ефремова салайааччылаах бастаабыт хамаанда “Туризм без границ” бырайыага биһирэнэн, муниципальнай программаларга, куонкурустарга кыттарга экспертэр сүбэлэрин ылла.
Бу күну лууспут ыччаттара бэйэлэригэр саҥа билиини, сонун көрүүлэри иҥэриннилэр. Бары үлэлэспит, көмө -тирэх буолбут дьоммутугар махталбытын биллэрэбит.
Тэрийэр бөлөх.