Дьокуускайга М.К.Аммосов аатынан ХИФУ-ка Саха норуодунай суруйааччыта, Аҕа дойду Улуу сэриитин кыттыылааҕа, бөдөҥ прозаик В.С.Соловьев-Болот Боотур төрөөбүтэ 110 сылыгар аналлаах «Болоттуун бииргэ» төгүрүк остуол ыытылынна.
Дьаһалы Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүүтэ тэрийдэ. Төгүрүк остуолга Тыл билимин хандьыдааттара Саргылаана Ноева, Людмила Григорьева уонна саха литэрэтиирэтин хаапыдыратын устудьуоннара, оскуола үөрэнээччилэрэ кыттыыны ыллылар.
Биир дойдулаахпыт, биллэр суруйааччыбыт Болот Боотур олоҕун, үлэтин биһиги улууспутугар Хатылы орто оскуолатын учууталлара Елена Иванова уонна Елена Аммосова киэҥник тарҕаталлар. Кинилэр бу дьаһалга Болот Боотур аатын сүгэр Хатылы орто оскуолата үйэтитиигэ ыытар үлэтин сиһилии сырдаттылар. Устудьуоннар Болот Боотур бөдөҥ айымньыларын ырыппыттарын билиһиннэрдилэр, суруйааччы хоһооннорун киһиэхэ тиийимтиэ гына толордулар.
Ити курдук, дьаһал кыттыылаахтара төгүрүк остуол тула олорон, биир дойдулаахпыт үтүө аатын салгыы үйэтитэр туһунан ырыттылар, торумнаатылар.
Марфа Петрова.