Эр дьон ортолоругар ыытыллар турнир өрөспүүбүлүкэҥэ бокса көрүҥүн сайдыытын үбүлүөйдээх 70 сылыгар ананыаҕа итиэннэ күрэхтэһии олунньу 16-21 күннэригэр Чурапчы нэһилиэгэр ыытыллара былааннанар диэн СИА иһитиннэрэр.
“Этиллибитин курдук Саха сирин быйылгы чөмпүйэнээтэ Чурапчы нэһилиэгэр буолуоҕа. Өрөспүүбүлүкэҕэ бокса сайдыбыта 70 сылын бэлиэтиибит инньэ гынан 2026 сылга ыытыллар туһааннаах күрэхтэр бука бары бу үбүлүөйдээх даатаҕа ананыахтара”, — диэн СӨ бокса Бэдэрэссийэтин толорор дириэктэрэ Алексей Индеев иһитиннэрдэ.
Турнир түмүгүнэн Саха сирин сүүмэрдэммит хамаандата таҥыллыаҕа. Маны тэҥэ улуус хамаандалара, кэлэ сылга Ньурба оройуонугар ыытыллыахтаах Саха сирин норуоттарын Ыспартыыбынай оонньууларыгар кыттар састааптарын быһаарыахтара.
Күрэхтэһии түмүгүнэн 13 ыйааһыҥҥа бастыҥтан бастыҥ боксердар быһаарыллыахтара. Санатан этэр эбит буоллахха ааспыт 2025 сыллаахха өрөспүүбүлүкэ чөмпүйүөннэринэн 48 киилэҕэ – Максим Припузов, 51 киилэҕэ – Иннокентий Слепцов, 57 киилэҕэ – Антон Копырин, 60 киилэҕэ – Валентин Иванов, 63,5 киилэҕэ – Леон Никифоров, 67 киилэҕэ – Андрей Портнягин, 71 киилэҕэ – Никита Малгин, 75 киилэҕэ – Артур Голиков, 80 киилэҕэ – Игорь Никифоров, 86 киилэҕэ — Антон Голиков, 92 киилэҕэ – Яков Седалищев уонна 92 киилэттэн үөһэ ыйааһыннаахтарга – Сергей Татаринов буолбуттара.
Онон Чурапчы улууһун олохтоохторо кэлэр нэдиэлэ өрөбүллэригэр быйылгы дьыллааҕы саамай тыҥааһыннаах, уҥа-хаҥас биэттэлэһиилээх кытаанах турниры кыраҕатык кэтээн көрүөхтэрэ.
Бэлэмнээтэ Сэмэн ЖЕНДРИНСКЭЙ