Балаҕан ыйын 1 күнэ, буоларын курдук, улууспут бары оскуолаларыгар өрө көтөҕүллүүлээхтик ыытыллар. Быйыл Д.Д.Красильников аатынан Мугудай орто оскуолата эмиэ бу күн учууталлары, үөрэнээччилэри, төрөппүттэри, ыалдьыттары үөрүүлээх линиэйкэҕэ көрүстэ.
Бастатан туран, бу ааспыт сайын үлэлэрин үтүө түмүгүнэн ситиһиилэммит учууталлар Сардаана Филиппова, Айсен Коркин, педагог-бибилэтиэкэр Елена Данилова гимн доҕуһуолунан былаахтары өрө көтөхтүлэр. Эҕэрдэ тылларын оскуола дириэктэрэ Николай Пермяков, «Мугудай нэһилиэгэ» тыа сирин түөлбэтин баһылыга Николай Аммосов, улуус дьиэ кэргэн, оҕо аймах дьыалаларыгар сүрүннүүр исписэлииһэ Татьяна Бушкова, үөрэх управлениетын отделын сүрүн исписэлииһэ Николай Артемьев эттилэр, учууталларга, оҕолорго саҥа үөрэх дьылыгар ситиһиилэри баҕардылар.
Нэһилиэк дьаһалтатын үлэһиттэрэ, сыл аайы буоларын курдук, оскуола боруогун аан маҥнай атыллаабыт 9 үөрэнээччигэ сэмэй бэлэхтэри туттардылар. Маҥнайгы кылаас үөрэнээччилэрин аатын сүкпүт оҕолор учууталлара Наталья Ильинична Жергиналыын мустубут дьон-сэргэ иннигэр тахсан бастакы хоһооннорун доргуччу эттилэр. Мугудай биир актыыбынай позициялаах олохтооҕо, үтүө дьыаланы өрүү өйүүр, кыттыһар, саас аайы төрөппүттэргэ уонна оҕолорго анаан күөгү күрэҕин көҕүлээн, бириис туруоран ыытар Григорий Потапов аҕыйах сылтан бэттэх оскуолаҕа саҥа киирэр оҕолорго анаан үөрбүт сирэй (смайлик) ойуулаах арыы бэлэх уунар. Ол үгэһин быйыл салҕаан 9 оҕо «смайликтары» тутан үөрдүлэр. Ону тэҥэ «Күбэйэ» уопсастыбаннай түмсүү эмиэ оскуолаҕа киирээччилэргэ хайаан даҕаны сыл аайы олус наадалаах бэлэхтэри биэрэллэр. Бүгүн түмсүү салайааччыта Евдокия Катакова эҕэрдэ тыл этэн, хас биирдии оҕоҕо үтүө баҕа санаатын этэн туттарда. Алтан чуораан лыҥкыначчы тыаһаата, үөрэх дьыла саҕаланна!
Наталья Сибирякова, ааптар хаартыскалара, видеота