Карл Маркс аатынан сопхуос киинигэр Дьаабылаҕа Шестакова Акулина Сергеевнаны быһаччы “биһиги Өкүлүүммүт” диэн ааттыыллара. Итиннэ дьиҥнээх ытыктабыл, киэн туттуу иэйиитэ иһиллэрэ.
Биһиэхэ “үлэ – чиэс, үлэ – хайҕал” диэн мээнэҕэ этиллибэт. Акулина Сергеевна кырдык да сыралаах үлэтинэн, үтүө майгытынан-сигилитинэн итинник ытыктабылы ылбыта.
Эдэркээн кыыс өссө Аҕа дойдуну көмүскүүр Улуу сэрии сылларыгар сүөһү үлэтигэр киирбитэ. Оччолорго уот кураан буолан, кини үрэх бастарыгар кыстыыра. Онно сүөһүнү бөлөхтөөн араарбакка, барытын бииргэ көрөллөрө. Ол сылларга эдэр сүөсүһүт субан ынахтары ыыра, ньирэйдэри бүөбэйдиирэ.
Онтон ыла отуттан тахса сыл ааспыта. Акулина Сергеевна олох кыһалҕатын эмиэ көрсүбүтэ: тапталлаах доҕоругар, колхуоһугар биир бастакы механизаторга Николай Ивановичка уҥуох туппута ити кэмҥэ быданнаабыт этэ. Аҥардас ийэ биэс төрөппүт оҕотун, биир кыра балтын оҕотун иитэн-аһатан, көрөн-истэн улаатыннарбыта. Санаан көрүҥ – аҥардас дьахтар 6 кыра оҕону уонна кэргэнин ийэтэ Маайа эмээхсини ииппитин. Дьиэ-уот, олох-дьаһах билиҥҥи курдук талбыт буолбатах этэ.
Бастыҥ ыанньыксыты, амарах сүрэхтээх ийэни, сэмэйтэн сэмэй киһини олохтоохтор олус ытыктыылларын биир сүрүн көстүүтүнэн кинини нэһилиэк Сэбиэтин дьокутаатынан хас да төгүл быыбардааһыннара буолар. Акулина Сергеевна төһө да түбүктээх сырыттар, уопсастыбаннай үлэҕэ бириэмэ булара. Дьокутаат эбээһинэһин толорорун таһынан, нэһилиэктээҕи дьахтар сэбиэтин үлэтигэр көхтөөхтүк кыттара. Өссө агитзона күннэрин атаарыыга, эмиэ көх-нэм буолара, күүһүн-күдэҕин биэрэрэ.
Бэйэтин идэтинэн Куула Күөл ферматыгар старшайдыыра. Кини сүөсүһүттэр бэрэстэбиитэллэрин быһыытынан кэлэрэ-барара, салалта иннигэр ферма кыһалҕатын туруорсан быһаартарара. Ферма старшайа ыанньыксыттарын кытта табан сыһыаннаһара, кинилэргэ эйэҕэс эдьиий, үтүөкэн сүбэһит, эрэллээх көмөлөһөөччү быһыытынан көстөрө. Кини бары наадалаах боппуруостарга ыанньыксыттарын кытта доҕордуу сүбэлэһэрэ, кинилэри саҥа ситиһиилэргэ көҕүлүүрэ.
Акулина Шестакова онус үбүлүөйүнэй пятилетка бастакы сылыгар 16 ынаҕын хас биирдиититтэн 1650 киилэ үүтү ыахтааҕын 1716 киилэнэн толорбута. 1977 сыллааҕы кыстык 4 ыйыгар 271 киилэ эбэһээтэлистибэлээҕин 321 киилэни ыан аһардыбыта.
Амарах сүрэхтээх ийэ оҕолорун сүһүөхтэригэр туруортаабыта. Улахан уола Коля эмиэ тыа хаһаайыстыбатын исписэлииһэ буоларга быһаарынан үнүстүүккэ үөрэнэ киирбитэ, кыыһа Валя үрдүк үөрэхтэммитэ. Түөрт кыра оҕолоро (биир балтын оҕото) Одьулууҥҥа, Мындаҕаайыга үөрэммиттэрэ.
Акулина Сергеевна Шестакова салайар Куула Күөл фермата Улуу Өктөөп 60 сыллаах үбүлүөйүн үлэҕэ кыайыынан көрсөргө дьулуспута.
Сэмэн Жендринскэй