Бүгүн о.э. бэс ыйын 2 күнүгэр, Кытаанах нэһилиэгин олохтоохторо, Саха сиригэр V-с өрөспүүбүлүкэтээҕи “Бииргэ сүүрэбит” диэн үтүө санаа аахсыйаҕа кыттыыны ыллылар.
Бу сүүрүүнү нэһилиэкпит биир бастыҥ уопсастыбанньыга Ксения Николаевна Гоголева сүрүннээн ыытта. Саамай кыра кыттааччы 3-тээх оттон саамай аҕам саастаах 94 саастаах.
Ытык киһибит Мотрена Семеновна Леонтьева хааман даҕаны буоллар, “аахсыйаҕа хайаатар да кыттабын” диэн тахсан эрэллээхтик хаамта. “Кытаанах нэһилиэгэ” тыа сирин түөлбэтин баһылыга Иван Пономарев бастакынан өйөөн тэбис-тэҥҥэ сүүрдэ. Нэһилиэк дьокутааттара, тэрилтэ салайааччылара, «Сыккыс» доруобуйаларынан хааччахтаах дьон түмсүүтэ, кэлээскэлээх Роман Максимов кыттыыны ыла кэлбитэ кэрэхсэнэр (салайааччы П.В. Новгородова), “Түһүлгэ” норуот айымньытын дьиэтин кэлэктиибэ (дириэктэр А.В. Пономарева), биэнсийэлээхтэр түмсүүлэриттэн кытыннылар (салайааччы Л.Н. Монгуш). Бу аахсыйа “Харысхал” пуонда 15 сыллаах үбүлүөйүн иитинэн тэриллэн, инбэлиит уонна доруобуйаларынан хааччахтаах оҕолорго оонньуур былааһакка оҥорорго туһаайылынна. Нэһилиэкпит дьоно-сэргэтэ туора турбаккалар көмөлөһө, сомоҕолоһон сылдьалларыттан киһи үөрэр, астынар. Итини таһынан сатаан кэлбэтэх олохтоохтор аахсыйаҕа “үбүнэн кыттыһабыт” диэн этии көтөҕөн – уопсайа холбоон 8400 солк хомулунна.
Лена Пономарева,
“Саҥа олох” хаһыат уопсастыбаннай кэрэспэдьиэнэ
Бэлэмнээтэ Сэмэн ЖЕНДРИНСКЭЙ