ХОЙ
Атырдьах ыйын саҕаланыыта хойдор хас даҕаны суолталаах боппуруостары быһаарыахтара. Үп-харчы эбиллиитэ уонна харчыга сыһыаннаах соһуччу бэлэхтэр баар буоулуохтара. Ый саҕаланыыта ону-маны атыылаһар табыгастаах буолуоҕа. Бу күннэргэ бэйэҕит актыыбынай буолуҥ, көстө-биллэ сатааҥ. Докумуоннаргытын бэрээдэктииргэ, сааһылыырга, исписэлиистэртэн сүбэни-аманы (чуолаан юридическай) ыларга үчүгэй кэм. Ый ортото олоххут духуобунай өттүн, бэйэҕит ис туруккутун көрүнэргит ордук. Доҕотторгут тэйиэхтэрин сөп, ол төттөрүтүн үчүгэйгэ буолар, аттыгар саамай чугастар хаалыахтара. Ый иккис аҥарыгар дьоҥҥо, этэр тылларыгар итэҕэйимэҥ. Саҥа билсиһиилэртэн тэйиччи туттуҥ.
ОҔУС
Атырдьах ыйа доруобуйаларын көрүммүт уонна сынньалаҥнарын толкуйдаабыт оҕустарга үчүгэйи түстүүр. Бу ыйга энергияҕытын толорорго, иэйиилэнэн айар дьоҕургутун сайыннарарга уонна биир интэриэстээхтэргитин кытта алтыһарга дьулуһуҥ. Ый саҕаланыыта арахса сылдьыбыттар холбоһуохтара эбэтэр этиммэтэх санааларын этиэхтэрэ. Ый ортото күүтүллүбэтэх ыарахан түгэн эбэтэр үпкэ-харчыга ыктарыы тахсыан сөп. Онно ыгылыйбакка, оттомноохтук толкуйдуур наадалаах. Ый иккис аҥарыгар аймахтаргыт эбэтэр чугас доҕоргут көмө көрдүөн сөп, онно көмөлөһөр ордук, бэйэҕитигэр үтүөнэн эргиллиэ. Ый бүтэһик нэдиэлэтигэр саҥаны саҕалаамаҥ. Ол оннугар буола турарга уонна бэйэҥ ис туруккар болҕомтоҕун уур. Аскытын көрүнүөххүтүн наада.
ИГИРЭЛЭР
Ый бастакы күннэригэр игирэлэргэ интуициялара күүстээх буолуо, элбэх боппуруоһу быһаарарга көмөлөһүө. Бэйэҕитигэр эрэниҥ. Олоххутун уларытыаххытын баҕарар буоллаххытына, бу – тоҕоостоох кэм. Доҕотторгут эбэтэр муударай аймаххыт сүбэлэрин истиҥ. Ый бастакы аҥарыгар доруобуйаҕыт мөлтүөн сөп, бырааска көрдөрүнэр ордук. Ый ортото тус олоххутугар соһуччу түгэн буолуо. Ол кэмҥэ бэйэҕит интэриэскитин учуоттуургут наада. Ый иккис аҥара айаҥҥа-сырыыга, оҕуруот, өрөмүөн үлэтигэр үчүгэй. Ол эрээри мэйиини сынньан саҥа бырайыактарга ылсар табыгаһа суох. Бүтэһик күннэргэ сынньанар, ис туругу бөҕөргөтөр ордук.
АРААК
Атырдьах ыйа ис туруккар болҕомто ууран, бэйэни кытта үлэлииргэ, олох хаамыытыгар тэҥҥэ киирсэргэ үчүгэй кэм. Арааһа, кэнники ыйдар эһигини сылаппыттар. Онон аҕыйах күн сынньанан ылан, доруобуйаны уонна аһы көрүнэн, күүлэйдээн ылар табыгастаах. Дьиэ кыылын иитэ ылаары толкуйдаабыт буоллаххытына, ый ортото табыгастаах. Атырдьах ыйын 22 күнүн кэнниттэн атын дойдуга баран сынньаныҥ, айаннааҥ. Ол эрээри элбэх киһи тоҕуоруһар сирдэриттэн уонна дегустациялартан туттунуҥ. Ый иккис аҥара былааннамматах кумааҕы үлэтэ тахсыан сөп. Онуоха тутатына бэйэҕэ наһаа элбэҕи ылынар наадата суох, ыалдьыаххытын сөп. Иммунитеккытын көрүнэ сылдьыҥ.
ХАХАЙ
Ый бастакы күннэрэ судургута суох буолуоҕа. Ньиэрбинэйдиэх, тулалыыр эйгэттэн туора туттуох санаалар киириэхтэрэ. Чугас дьоҥҥутун кытта дьылҕаны быһаарар суолталаах кэпсэтиилэри ыыппат ордук. Ордук хоһу саҥарыаххытын эбэтэр атыннык өйдөһүөххүтүн сөп. Ый ортото барыта оннугар түһэн иһиэ. Саҥаны билэргэ, омук тылын үөрэтэргэ, айарга-тутарга тоҕоостоох кэм. Ону тэҥэ айанныырга, атын дойдулары көрөргө үчүгэй кэм, эһиги энергияҕытын толорор дьиктилээх. Ый 20 чыыһылатын кэнниттэн сыралаах үлэҕит түмүгэ көстүө. Бу кэмҥэ ким эрэ көмөтүгэр эрэнимэҥ, төттөрүтүн түһэн биэриэхтэрин сөп. Ый бүтүүтэ тус олоххутугар үчүгэй уларыйыылар буолуохтарын сөп. Дьыалабыай этиилэр киириэхтэрэ.
КЫЫС
Ый ситиһииттэн саҕаланыан сөп. Бастакы күннэргэ уруккуттан сылдьар ыарахан соруктары быһаарыаххыт. Аскытын көрүннэххитинэ, утуйдаххытына, интуицияҕыт эһигини кытта үчүгэй сибээһи олохтуо. Ый ортото үчүгэй өрүккүтүн көрдөрөн, интэриэһинэй уонна инникилээх этиилэр киириэхтэрэ. Ый иккис аҥара эмоцияҕа бэриммэккэ сырыттаххытына, этэҥҥэ ааһыа. Сарсыардатын бэйэни дьиссипилиинэлиир ритуаллары оҥостун, оччоҕо дьыалаҕыт табыллыа. Сэрээккэ, тымныы душ көмөлөһүөн сөп. Бүтэһик нэдиэлэҕэ кэллиэгэҕит өттүттэн эһиги үлэҕитин сыаналаабат, түһэрэ сатыыр быһыы тахсыан сөп. Ол киһини кытта сыһыаҥҥытын көрүөххүтүн наада. Ый бүтүүтэ айылҕаҕа тахсан сынньанар ордук.
ЫЙААҺЫН
Ый бастакы аҥара олоххутун үчүгэй өттүгэр уларытарга барсар. Ол эрээри эһиги тугу да уларыппакка, хайдах баарынан хааллара сатыыргыт мэһэйдиэ. Толкуйгутун, санааҕытын сааһылаан, уларытар кыах бэриллибитин туһанар наада. Үгүс бириэмэни бараабыт, эрэммит дьыалаҕыт табыллыан сөп. Ый ортото инникилээх билсиһии тахсыан сөп, уопсай интэриэһинэн биир бырайыакка ылсыаххытын сөп. Ону тэҥэ настарыанньаны көтөҕөр романтическай билсиһии эмиэ буолуон сөп. Ый иккис аҥарыгар кыыһыран тымтар үчүгэйгэ тиэрдиэ суоҕа. Оннукка тиэрдибэт туһугар салгыҥҥа күүлэйдии, физкултууранан дьарыктана сылдьыҥ. Ый бүтэһик чыыһылаларыгар барыстаах сөбүлэҥи түһэрсии эбэтэр атастаһыы буолуон сөп.
СКОРПИОН
Сулустар судургута суох ыйы түстүүллэр. Боростуой да түмүктэри ситиһэргэ элбэх сыраны ууруоххут. Көһүппэтэх өттүттэн ыарахаттар көстүөхтэрэ. Бэйэ күүһүн-кыаҕын сүтэрбэт гына сөпкө аһыы, утуйа сылдьыаххытын наада. Ый ортотун диэки ыарахан балаһа ааһыаҕа, кыһалҕалар быһаарыллыахтара. Урукку кэминээҕи дьон биллиэхтэрэ, ол эрээри кинилэртэн сэрэнэр ордук. Ый иккис аҥарыгар дохуоккут эбиллиэн сөп. Күүппэтэх дьоҥҥутуттан сүбэ-ама, көмө кэлиэн сөп. Ый бүтэһик күннэрэ сүпсүлгэннээх буолуо, онон бу кэмҥэ наадалаах дьыалаларгытын хаалларымаҥ.
ОХЧУТ
Ый биир тэҥник ааһыаҕа. Аскытын, эрэсиимҥитин тутустаххытына, ньиэрбинэй систиэмэҕит махтаныа. Ый бастакы аҥара доҕоттору кытта көрсөргө, айанныырга, кэлэргэ-барарга үчүгэй. Улахан дьыалаларга ылсыбакка, үчүгэйгэ эрэ тардыһа сылдьар ордук. Ый ортото харчы барааһына баар. Иэс биэримэҥ, төннөрүө суохтарын сөп. Ый иккис аҥарыгар түбүгүрүү саҕаланыа, бириэмэҕитин аттарына үөрэниэххитин наада. Ый бүтүүтэ чугас дьоҥҥут кыһалҕаны үөскэтиэхтэрин сөп. Оннук тахсар түгэнигэр бэйэҕит интэриэскитин инники туруоруҥ.
ЧУБУКУ
Ый саҕаланыыта хас даҕаны табыгастаах кыах бэриллиэҕэ. Бу кэмҥэ эһиги кэллиэгэлэргитигэр, атын да дьоҥҥо аһыллан санааҕытын үллэстиэххитин баҕарыаххыт. Ол эрээри онтон туттунар ордук, ол кэпсээбиккитин көһүппэтэх өттүгүтүттэн утары туруоран таһаарыахтарын сөп. Ый ортото саҥа дьыалабыай бырайыактары саҕалыырга, доруобуйаны тупсарарга үчүгэй кэм. Билбэт, ураты сирдэргэ бара сылдьыҥ. Саҥа уулуссалар, тутуулар, мусуойдар, атын дьон олоҕу атыннык ылынарга, ураты идиэйэлэри киллэрэргэ көмөлөһүөхтэрэ. Ый бүтэһик күннэригэр бөҕү-саҕы ыраастыырга, быраҕарга тоҕоостоох.
КҮРҮЛГЭН
Ый чопчу сыалы-соругу туруоран ситиһэргэ табыгастаах. Ый саҕаланыыта оҕуруот, олорор усулуобуйаны тупсарарга, үлэ саҥа көрүҥнэригэр ылсарга үчүгэй кэм. Айар үлэлээх дьоҥҥо иэйии киирэригэр, баҕа санааны толорорго үчүгэй кэм. Ый ортото тус олоххутугар болҕомтону уурарга ирдиир. Сыһыан өттүгэр соччото суох быһыылар тахсыахтарын сөп. Олоххут тэтимэ намтыан, чугас дьоҥҥут туһуттан санаарҕыаххытын сөп. Онон доруобуйаҕытын, ис туруккутун көрүнүөххүтүн наада. Ый бүтүүтэ суолга, тырааныспарга сэрэхтээх буолуҥ.
БАЛЫКТАР
Бастакы күннэртэн туһааннаах боппуруостары быһаарарга ылсаргыт наада. Күүскүт-кыаххыт эбиллэ сылдьар кэмэ буолан, барыта табыллан иһиэҕэ. Хамаанданан үлэ ситиһиигэ тиэрдиэҕэ. Ый ортото лидерскэй хаачыстыбаҕытын көрдөрүөххүтүн наада. Ол дохуоккутугар, тус олоххутугар үчүгэйдик дьайыаҕа. Эбии эбээһинэстэри да ылынартан куттанымаҥ. Ый иккис аҥарыгар соруктары быһаарар ыарахан буолуоҕа, доруобуйа да туруга мэһэйдиэн сөп. Атын дойдуга сынньана, айылҕалыын алтыһа, өрүскэ-үрэххэ, чуумпуга баран, ис туруккутун чөлүгэр түһэриэххитин сөп.
Бэлэмнээтэ Елена Макаринская