Өрөспүүбүлүкэ улуустарыгар хортуоппуйу уонна оҕуруот аһын уурар-харайар 90-ча тутуу баар. Балар холбоон 30 тыһыынчаттан тахса туонна ас хаһааныллар истээхтэр. Ити иһигэр сэбиэскэй саҕанааҕыта ахсааннаах. Кэлин 2012 сылтан саҕалаан судаарыстыба өйөбүлүнэн тутуллубут эбийиэктэр баараҕайдар уонна тупсаҕай оҥоһуулаахтар. Барыта 2018 сылтан саҕалаан 19 эбийиэги тутууга 6 сыл устатыгар 341,8 мөл. солк. ороскуоттаммыт, ити иһигэр өрөспүүбүлүкэ бүддьүөтүттэн үбүлэниитэ – 241,3 мөл. солк.
Икки сыллааҕыта СӨ Ил Дархана Айсен Николаев Чурапчы улууһугар кэлэ сылдьан “Чурапчы” ТХПК үлэтин-хамнаһын көрөн-истэн, сыаналаан барбыта. Онно кини Чурапчы улууһа аһы-үөлү оҥорон таһаарыыга биир бастыҥ оройуон буоларбытын күүскэ тоһоҕолоон бэлиэтээбитэ итиэннэ үлэ-хамнас тэтимнээхтик барарыгар саҥа соруктары туруоран, бары үтүөнү баҕаран барбыта.
Чурапчы улууһугар күн-бүгүн элбэх киһи хортуоппуй олордуутунан дьарыктанар, ол эрээри харайар сирдэрэ суох, ыал барыта оҥкучахтаах буолбатах, аны батарыыта даҕаны кыһалҕалардаах буолар.
Дьэ ити инниттэн, “Чурапчы” ТХПК салалтата олохтоохтору 250 туоннаҕа тиийэ оҕуруот аһын харайар ыскалааттарыгар ыҥыраллар: “Улууспут олохтоохторун өлгөм үүнүүлээх сайын ааспытынан эҕэрэдэлээн туран, балаҕан ыйын 23 күнүттэн овощехранилищебыт үлэтинг саҕалыырын иһитиннэрэбит. Уурунуу иһин төлөбүр 1 киилэтэ ыйга 6 солкуобай. Куулгутугар тигэр бииркэҕитин алдьаммат матырыйаалтан оҥосто сатааҥ, ааккытын-суолгутун чуолкайдык көстөр гына толору суруйаҕыт. Куулгутун төһө кыалларынан сиэккэ гына сатааҥ итиэннэ бөҕө буоларын курдук икки хос сиэккэҕэ угаргыт ирдэниллэр”.
Былырыыҥҥыттан саҕалаан кээпэрэтиип бэрэстээтэлинэн талыллан, кэскиллээхтик үлэлиир Николай Ильич Петров саҥаны сэҥээрэн, дьон-сэргэ туһугар түргэнник ылсан, хамсанан, кэҥээн, сайдан иһэрэ үөрдэр.
Сэмэн ЖЕНДРИНСКЭЙ