Аммаҕа ыытыллар Олоҥхо ыһыаҕар Чурапчыттан 200-тэн тахса кыттааччы айаннаата

Бэс ыйын 20-21 күннэригэр Амма улууһугар ыытыллар XVII өрөспүүбүлүкэтээҕи олоҥхо ыһыаҕар Чурапчы улууһуттан 200-тэн тахса кыттааччы бүгүн сарсыарда Маҕаайы алааһыттан  айаҥҥа туруннулар.

Ыраах айаҥҥа турунуох иннинэ, Ытык Маҕаайыбыт алааһыгар, улууспут дэлэгээссийэтигэр  кыайыыны-хотууну, ситиһиилэри баҕаран туран Үрдүк Айыылартан көрдөһөр алгыс ылыныытын сиэрэ-туома ыытылынна. Алгыһы улууспут ытыктанар дьоно, култуура үтүөлээх үлэһиттэрэ Надежда Заболоцкая, Мария Герасимова түһэрдилэр. Алгыс сиэрин-туомун ситэрэн Зоя Мохначевская тойуктаата.

Кыттааччылар өрөспүүбүлүкэтээҕи олоҥхо ыһыаҕар ситиһиилээхтик кыттан кэлэллэригэр эҕэрдэ тылы улуус баһылыгын социальнай боппуруостарга солбуйааччы Мария Кронникова, улуус дьокутааттарын Сэбиэтин бэрэссэдээтэлэ Яков Оконешников эттилэр.

 

«Алгыстаах Амма сиригэр — уотугар буолаары турар олоҥхо ыһыаҕар биһиги улууспут  дьоно олоҥхо күрэҕэр биирдиилээн толорууга оҕолорго, ыччаттарга, улахан дьоҥҥо уонна бөлөҕүнэн толорууга барытыгар кыттыахтара. Оһуохай күрэҕэр Чурапчылыы оһуохайы таһаарыахтара уонна оһуохай араас көрүҥэр барытыгар кыттыыны ылыахтара. Чабырҕахха, дэгэрэҥ ырыаҕа  уо.д.а олоҥхо ыһыаҕын күрэҕин бары көрүҥнэригэр кыттыахтара. Иистэнньэҥнэрбит кыһын устата тикпит таҥастара-саптара, тимир уустарбыт уран оҥоһуктара көрдөрүүгэ туруохтар. Маны сэргэ дэгиттэр спорсменнарбыт спорт араас көрүҥнэригэр илин-кэлин түсүһүөхтэрэ. Онон Амма кытылыгар ыытыллар Олоҥхо ыһыаҕын түһүлгэтиттэн кыттааччыларбыт ситиһиилээх кэлиэхтэрэ диэн эрэнэбит», — диэн Мария Филипповна үллэстэр.

Бары кыттааччыларга үрдүк ситиһиилэри, кыайыыны — хотууну баҕарыаҕыҥ.

Людмила Горохова, ааптар хаартыскаҕа түһэриитэ уонна видеоҕа устуута.