Күндү эдьиийбит Картузова Дарья Алексеевна бу дьыл, алтынньы 30 күнүгэр ыарахан ыарыыттан олохтон туораабыта 1 сыла туолла.
Кини 1947 сыл, алтынньы 6 күнүгэр Таатта оройуонун Ытык Күөлүгэр Татьяна Михайловна, Алексей Дмитрьевич Картузовтарга маҥнайгы оҕонон төрөөбүтэ. Хатылы оскуолатыгар 8 кылааһы бүтэрэн баран, ЯТХТ-ҥа үөрэнэ киирбитэ. Салгыы Болтоҥо оскуолатыгар иитээччинэн, Хатылыга интэринээт сэбиэдиссэйинэн үлэлии сылдьыбыта. “Субуруускай” сопхуоска каадыр отделыгар үлэлээбитэ.
1971 сыл Улан-Удэҕэ Илин Сибиирдээҕи култуура институтун бибилэтиэкэ факультетыгар үөрэнэ киирбитэ. Үөрэҕин бүтэрэн, Чурапчы оройуонун бибилэтиэкэтигэр хааччыйыы отделыгар сэбиэдиссэйинэн анаммыта. Онтон ыла, үксүн библиограбынан, методиһынан үлэлээбитэ. 1990-1996 сс. Чурапчыга киин бибилэтиэкэҕэ дириэктэринэн анаммыта. Чурапчы библиотечнай систиэмэтин сайдыытыгар эҥкилэ суох үлэлээн, тус кылаатын киллэрсибитэ. Саха Өрөспүүбүлүкэтин култууратын туйгуна.
Эдьиийбит Дария ыал улахан оҕото буолан, сүрдээх дьаһаллаах этэ. Биһиги оҕолорбут оскуола кэнниттэн Дьокуускайга киирэн, эдьиийдэригэр олорон, орто анал, үрдүк үөрэхтэргэ үөрэммиттэрэ. Ийэлии көрөн-истэн, бүөбэйдээн, кыһаллан, үгүс сыратын биэрбитэ. Онон эдьиийбитигэр махталбыт муҥура суох.
Күндү эдьиийбит биһиги олохпутугар оҥорбут үтүөтүн хаһан да умнуохпут суоҕа. Куруук ахта-саныы, өйдүү сылдьыахпыт.
Бииргэ төрөөбүт балта, бырааттара, сиэн балтылара, аймахтара.