От ыйын 1 күнүгэр, Таатта уонна Чурапчы улууһун лиинийэтин нөҥүө иккис баартыйанан уолаттар 1 сыллаах байыаннай сулууспаҕа аттаммыттара. Кинилэр ортолоругар Одьулуун нэһилиэгин ыччата эмиэ баара, Хабаровскай куорат инженерно-сапернай чааһыгар түбэһэн сулууспата этэҥҥэ саҕаланан испитэ.
Оттон бүгүн бобулаах ситим нөҥүө: “Бу уонча хонук иннигэр сиэним аармыйаҕа барбыта. Тиийэтин кытары “С” категорияҕа үөрэниэн баҕалаахтарга диэн илии баттаппыттар. Илии баттаабыттарын кэнниттэн тутатына кинилэри арааран атын чааска илдьибиттэр. Ол онтулара соһуйуохтарын иһин анал байыаннай дьайыыга барааччылары бэлэмниир сир эбит. Мантан чааһыгар эрийэн көрбүппүтүн “уол бэйэтэ баҕатынан баттаабыт!””, — диэн хамандыырдара ыһыы-хаһыы бөҕөнү түһэрбитэ. Ол иһин кыыһым, өссө биир ийэни кытары сүбэлэһэннэр, дьонтон сүбэлэттэрэннэр, Хабаровскайга көппүттэрэ. Байыаннай чааска тиийэннэр хамандыырдарын көрсөн, бирикээстэрин ылан ааҕан “хата бэчээтэ суох эбит” көтүттэрдилэр. Онон онуоха-маныаха диэри уоскуйбут курдук буоллубут даҕаны син биир “испитигэр кутуйах сүүрэр”. Киһи-киһини итэҕэйбэт үйэтэ буолла. Инникитин төрөппүттэргэ, сулууспалыыр барар уолаттарга да туһалаах буолаарай диэммин суруйдум. Бары этэҥҥэ буолуҥ, аат сэриитэ бүтэ эрэ оҕустун!”, — диэн ис хоһоонноох кыра иһитиннэрии тарҕанна.
Хомойуох иһин бу сурук оруннаах буолан биэрдэ, суруналыыс буоларбыт быһыытынан, сулууспалыы тиийбит уол ийэтин В.В төлөпүөнүн булан быһа сибээскэ тахса сырыттыбыт: “Хабаровскай куоракка кэлэн, уолум сулууспалыыр чааһыгар хамандыыры кытары көрсөн кэпсэтэн, тугун-ханнык билсэн бу төттөрү айаннаан эрэбит. Миигин кытары Томпоттон өссө биир ийэ баар. Уопсайынан уолаттар бэйэлэрэ болҕомтолоох буолуохтарын наада эбит, тугу биэрэллэрин сирийэн ааҕан, ыйыталаһан эҥиннээн. Илии баттаабыт кумааҕыларыгар бэчээттэрин туруора иликтэр эбит. Хамандыырдара «ханнык да сэриигэ ыыппаппыт» диэн рапорт-араспыысканы суруйда, уолум хантараак баттаспытын туһунан кумааҕыны көрдөрбөтүлэр, туох даҕаны ситэри биллибэт. Ити уолаттар байыаннай бирисээгэ да биэрэ иликтэр, чаастарыгар тиийбиттэрэ 9 эрэ күн буолла. Үрдүкү станциялар үлэлэһэллэр ини диэн бэйэбит-бэйэбитин уоскутунабыт. Оттон ити куйаар ситимигэр арааһа эһэбит суруйан ыыппыт быһыылаах. Бу маннык быһыы-майгы инникитин тахсыбатын туһугар төрөппүттэргэ эрэ буолбакка, оройуон байыаннай хамыһаарыттан саҕалаан Сахабыт өрөспүүбүлүкэтин Бырабыыталыстыбатын салалтата, Ил Дархан бэйэтинэн хонтуруолга ылаллара ордук буолуох эбит. “Ийэ сүрэҕэ мэлдьи уолугар” диэн мээнэҕэ этиллибэт”.
Сэмэн ЖЕНДРИНСКЭЙ