Балаҕан ыйын 1 күнүгэр буойун-учуутал Степан Кузьмич Макаров аатын сүгэр Чурапчы гимназиятыгар Билии күнүгэр анаммыт үөрүүлээх линиэйкэтэ долгутуулаахтык, өрө көтөҕүллүүлээхтик ааста. Быйылгы үөрэх дьылын гимназия уопсайа 307 үөрэнээччилээх көрүстэ.
Үөрүүлээх тэрээһин саҕаланыытыгар Арассыыйа, Саха Өрөспүүбүлүкэтин уонна Чурапчы улууһун былаахтарын «Мохсоҕол» байыаннай-патриотическай кулууп иитиллээччилэрэ өрө күөрэччи анньан таһаардылар. Салгыы, дохсун ытыс тыаһынан, быйыл гимназист үрдүк аатын сүкпүт 5 кылаас оҕолоро учууталларынаан Зоя Николаевна Сивцевалыын, Николай Николаевич Романовтыын киирдилэр. Быйыл гимназия 5-с кылааһыгар 48 оҕо туттарсан киирдилэр, мантан 30-та кыыс, 18-һа уол. Оттон 11 кылаас үөрэнээччилэрэ учууталларынаан Инга Васильевна Слепцовалыын, Сергей Сергеевич Абрамовтыын, Игорь Васильевич Сивцевтыын сибэкки тутуурдаах киирдилэр. Быйыл 11 кылааһы 41 оҕо түмүктүүр.
Дьоро чааска С.К. Макаров аатынан Чурапчы гимназиятын дириэктэрэ Юрий Слепцов, үөрэх салалтатын начаалынньыга Юрий Посельскай, Чурапчы гимназиятын төрүттээччи уонна бастакы дириэктэр Альбина Иустинова, Чурапчы улууһун прокурорун эбээһинэһин толороччу Айсен Прокопьев, 11-с кылаас үөрэнээччитэ Анна Лазарева Билии күнүнэн эҕэрдэ тыллары эттилэр. Үөрүүлээх быһыыга – майгыга дириэктэр Юрий Слепцов 2025-2026 үөрэх дьылын түмүгүнэн биир кэлим эксээмэҥҥэ муҥутуур 100 баалы ылары ситиспит үөрэнээччилэри бэлэмнээбит учууталларга: Александра Апрельевна Куличкинаҕа, Лена Романовна Семеноваҕа, Фекла Николаевна Болдовскаяҕа 50000 суумалаах туоһу суруктары туттарда. Салгыы маҥнайгы алтан чуораан лыҥкынаан үөрэх дьыла саҕаламмытын туоһулаата.
«Быйыл 5-һис кылааска гимназиябыт боруогун атыллаан 48 оҕо киирдилэр, уопсайа 307 үөрэнээччилээхпит. Педагогическай састаап толорубут, күн бүгүҥҥэттэн бары тутуспутунан үлэбитин-хамнаспытын саҕалаатыбыт. Выпускниктарбыт 100% бары үөрэххэ киирдилэр. 87% үрдүк үөрэххэ, 8 үөрэнээччибит өрөспүүбүлүкэ таһыгар: Екатеринбург, Казань, Казахстан уонна Кытай үрдүк үөрэҕин кыһаларыгар тутарсан киирдилэр. Бэлиэтээн эттэххэ, быйылгы тыа хаһаайыстыбатын дьаарбаҥкатыгар учууталларбыт ситиһиилээхтик кытыннылар. IT хайысхалаах оскуолаларга муҥутуур кыайыылаах буолан, 50 тыһ. суумалаах туоһу суругунан наҕараадаланныбыт. Салайааччы Игорь Васильевич Сивцев. Эдэр педагогтар хамаанданан күрэхтэригэр Оксана Степанова Данилова салайааччылаах хамаандабыт “Бастыҥ эдэр учууталлар” атыы ылары ситистилэр. Киэн туттуубутунан оҕолорбут буолаллар, кинилэр биир кэлим эксээмэни ситиһиилээхтик суруйаннар, үс оҕобут муҥутуур 100 баалы ыланнар «Тыа сирин бастыҥ оскуолата” ааты сүктүбүт. Маны сэргэ, Аан дойдутааҕы интелектуальнай оонньууларга улуус аатыттан алта үөрэнээччибит Ирина Саввична Соловьева салайааччылаах ситиһиилээхтик кытыннылар. Быйылгы үөрэх дьыла эмиэ үтүө түмүктэрдээх, туруоруммут былааннарбыт санаа хоту олоххо киирэннэр, кэлэр кэнчээри ыччаттарбыт өссө үрдүктэн-үрдүк дабайыылары ситиһэн, баҕарбыт идэлэригэр киирэн истиннэр диэн баҕарабыт», — диэн гимназия дириэктэрэ эттэ.
Бу курдук өркөн өй уйата, үөрэх-билии сырдык кыһата – Степан Кузьмич Макаров аатынан Чурапчы гимназията Билии күнүн үрдүк ситиһиилэрдээх, үөрүү-көтүү аргыстаах көрүстэ. Тэрээһин уопсай хаартыскаҕа түһүүнэн түмүктэннэ.
Людмила Горохова.