Урбаанньыт күнүн чэрчитинэн, Чурапчы киинигэр Бизнес-инкубатор дьиэтэ үөрүүлээх быһыыга-майгыга аһылынна.
Аалай кыһыл лиэнтэни улуус баһылыга Степан Саргыдаев, салайааччы Иван Пермяков уонна резидент Татьяна Евграфова быстылар.
Манна билигин 6 киһи бэйэ дьарыктаах буолан, үлэлии-хамсыы олороллор. Ол курдук, “Харысхан мебель” (сал. Герман Белолюбскай), “Мимизонок” (сал. Валентина Адамова), “VRPlayBox” (сал. Дмитрий Седалищев), “Мастерская Татьяна” (сал. Татьяна Евграфова), “Фото – Эксперт” (сал. Михаил Оконешников), “Фитнес — центр” (сал. Владислава Михайлова).
Владислава Михайлова:
- Бастаан манна киирэрбэр соҕотох этим. Салгыы элбээн, билсэн, билигин үлэбэр үөрэ-көтө кэлэбин. Биһиги бары социальнай хантыраак баар буолан, ону туһанан, бэйэ дьыалатын саҕалаабыппыт. Билиҥҥи үйэҕэ киһи баҕалаах эрэ буолуон наада, хайдах баҕарар үлэлиэххэ-хамсыахха сөп.
Бу бизнес-инкубаторга арендабыт чэпчэтилээх буолар, ону таһынан сүбэ-ама, күүс-көмө буолаллар. Онон үүнэргэ-сайдарга, инникигэ эрэлбит улахан.
Елена Макаринская