С.А. Новгородов аатынан Чурапчы орто оскуолатыгар РФ сенатора, экономиечкай наука доктора Егор Афанасьевич Борисов үбүлүөйдээх 70 сааһыгар аналлаах үөрэнээччилэргэ уонна учууталларга өрөспүүбүлүкэтээҕи «Борисов ааҕыылара» научнай-практическай кэмпириэнсийэ буолла.
Кэмпириэнсийэ үөрүүлээх аһыллыыта үөрэнээччилэр судаарыстыбаннай былаахтары күөрэччи тутан киирэн, туруорууларыттан уонна өрөгөй ырыаны толорууларынан саҕаланна. Киирии тылы оскуола дириэктэрэ Михаил Игнатьев эттэ. Кини эҕэрдэлээн туран, кэмпириэнсийэ сыалын-соругун билиһиннэрдэ:
«Биир дойдулаахпыт, бөдөҥ политическай диэйэтэл, оскуолабыт выпускнига Егор Афанасьевич өрөспүүбүлүкэбит, улууспут сайдыытыгар киллэрбит сүҥкэн кылаатын, кини үлэтин, олоҕун , үтүө аатын сайыннарыыга, үйэтитиигэ үлэлэһиэхтээхпит. Онуоха бу кэмпириэнсийэ үтүө үгэскэ кубулуйан быйыл бэһис төгүлүн ыытылынна. Икки сылга биирдэ тэрийэн ыытабыт. Сүрүн сыалынан талааннаах оҕолору таһаарыы, оскуола оҕолорун наукаҕа, бырайыактыыр үлэҕэ көҕүлээһин, Ийэ дойдуга бэриниилээх буолууга иитии, Педагогическай уопуту тарҕатыы буолар”.
Дьаһалга улуус баһылыгын социальнай боппуруостарга солбуйааччы Мария Кронникова, улуустааҕы үөрэх салалтатын начаалынньыга Юрий Посельскай, Дьокуускайдааҕы педагогическай колледж научнай методиһа Нюргуяна Иванова уонна да атыттар кыттыыны ыллылар.
Мария Филипповна Кронникова:
— РФ Сенатора, ытыктыыр киһибит Егор Афанасьевич оҕо сааһа Чурапчы нэһилиэгэр ааспыта. Кини Чурапчы түөлбэтигэр улаатан, бииртэн биир үктэлгэ үлэлээн, дьон ытыктабылын, махталын ылыан ылан, өрөспүбүүлүкэ салайааччытыгар диэри үүммүтэ. Быйыл Егор Афанасьевич 70 сааһын туолар үбүлүөйүнэн улууспутугар араас дьаһаллар ыытылыннылар. Олортон биирдэстэринэн Егор Афанасьевич ыччаты уонна оскуола үөрэнээччилэрин кытта көрсүһүүтэ буолар. Дьаһал кини аатын сүгэр бибилэтиэкэҕэ ыытыллыбыта. Оҕолор кэпсэтиигэ көхтөөхтүк кыттан, ыалдьыттан тиһигин быспакка араас интэриэһинэй боппуруостары биэрбиттэрэ. Егор Афанасьевич бииртэн биир муударай эппиэттэрэ кэлбит дьону сөхтөрбүтэ. Холобур, лидер киһи хаачыстыбатын туһунан ыйытыыга Егор Афанасьевич лидеры норуот бэйэтэ оҥорон таһаарар диэн хоруйдаабыта. Ол эбэтэр, биһиги ис иһиттэн бэйэтин дьыалатын билэр, бэриниилээхтик үлэлиир дьону иитэн таһаарыахтаахпыт. Оччоҕо оҕолорбут ситиһиилээх буолалларын өйдүөхтээхпит. Онуоха Егор Афанасьевич курдук биир дойдулаахтарбыт дьоһун олохтохторо холобур буолаллар.
Кэмпириэнсийэҕэ 7 улуустан, 27 оскуолаттан 119 үөрэнээччи, 43 учуутал кытынна. Оҕолорго 5 сиэксийэ үлэлээтэ: «Саха АССР уонна СӨ уһулуччулаах судаарыстыбаннай диэйэтэллэрэ. Егор Афанасьевич Борисов олоҕун, үлэтин ис хоһооно”, “Тыа хаһаайыстыбатын науката”, “Сир науката уонна тулалыыр эйгэ”, “Экономика уонна үөрэнээччи бизнес-бырайыага”, “Техническэй наука”.
Учууталларга үс сиэксийэ үлэлээтэ: «Өрөспүүбүлүкэ уһулуччулаах дьонун олохторун холобуругар олоҕуран кэнчээри ыччаты иитии”, “Уруок хаамыытыгар саҥа сүүрээни киллэрии”, “«Сатабыл эйгэтэ» — оҕо дэгиттэр сайдар суолун аартыга”. Манна педагогтар бэйэлэрин иитэр-үөрэтэр үлэлэрин уопутун тарҕаттылар.
Кыттааччылар үлэлэрин идэлээх эспиэрдэр сыаналаатылар., кыайыылаахтары таһаардылар.
Төрөөбүт дойдутун, саха норуотун туһугар олоҕун анаабыт патриокка, СӨ бастакы Ил Дархана Егор Афанасьевич Борисовка анаммыт кэмпириэнсийэ үрдүк таһымнаахтык ыытыллан, Саха сирин сайдыытыгар сүҥкэн кылааттарын киллэрбит политическай диэйэтэллэр ааттара үйэтитиллэр.
Марфа Петрова.