Сыл аайы, буоларын курдук, улууспутугар оҕо сайыҥҥы сынньалаҥын тэрийии саас эрдэттэн торумнанан ситимнээхтик ыытыллар. Бу туһунан улуустааҕы үөрэх управлениетын иитии уонна эбии үөрэхтээһин салаатын салайааччы Евгения Чичигинарова кылгастык сырдатар:
«Быйыл Чурапчы улууһугар, уопсайа, 25, ол иһигэр 19 күнүскү, 2 хонуктаах, 4 балаакканан, лааҕыр үлэлиирэ былааннанар, ону таһынан өрөспүүбүлүкэтээҕи таһымнаах итиэннэ Краснодарскай кыраай чэбдигирдэр лааҕырдарыгар эмиэ улуус оскуолаларын үөрэнээччилэрэ уонна байыаннай дьайыы кыттыылаахтарын оҕолоро анал сменаларга барыахтара. Сайын устата 1830 оҕо лааҕырдарынан хабыллыаҕа.
Чурапчытааҕы дьарыктаах буолуу киинин нөҥүө профилактическай учуокка турар оҕолорго сокуоннай саастарын ситэ илик оҕолор дьыалаларын көрөр уонна кинилэр бырааптарын көмүскүүр хамыыһыйа быстах кэмҥэ дуогабар түһэрсэн, туһалаах сайыҥҥы сынньалаҥы тэрийиэҕэ.
Аныгы үйэ сиэринэн, сайыҥҥы сынньалаҥ түгэннэрэ араас социальнай ситимнэргэ сырдатыллыахтара. Оҕолор бары уһун сынньалаҥнарын интэриэһинэйдик, туһалаахтык атаарыахтара диэн эрэнэбит».
Ити курдук, үгүс оҕону хабар, умнуллубат сайыҥҥы түгэннэри бэлэхтиир, үлэҕэ, спорка, үөрэххэ, доруобуйаны тупсарыыга, онтон да атын хайысхаҕа туһуламмыт лааҕырдар күргүөмнээх үлэлэрэ номнуо саҕаланна.
Наталья Сибирякова