Биһиги оройуоммут сыспай сиэллээҕи иитиигэ өрөспүүбүлүкэҕэ тиийэ биллэр үтүө үлэһиттэрдээх.
Өссө 1947 сыллаахха Р.И. Константинов 55 биэттэн 55 кулуну ылары ситиһэн Социалистическай Үлэ Дьоруойун үрдүк аатын ылбыта. Ити көрдөрүүнү 29 сыл буолан баран Эрилик Эристиин аатынан сопхуос сылгыһыта В.Р. Толстоухов тупсарбыта. Онус пятилетка иккис сылыгар Карл Маркс аатынан сопхуостан М.С. Толстоухов 81 биэттэн 81 кулуну ылан оройуон саҥа рекордун олохтообута. Ол эрээри ити да көрдөрүү уһун үйэлэммэтэҕэ. Ударнай сылга кини бииргэ үлэлээбит табаарыһа Василий Смирников 85 биэттэн 85 түөҕү ылан тыыннаах иитэн ордук чаҕылхай ситиһиилэммитэ.
Саҥа рекордсмен – сатабылы, уопуту, дьулууру эрэйэр сылгыһыт уустук идэтин бары мындырдарын дьиҥнээхтик баһылаабыт киһинэн буолар. Кини кэнники сылларыгар эриэ-дэхси үчүгэй түмүктэри оҥорбута. Ол кистэлэҥинэн ыччат сылгыны анаан-минээн көрүүтэ-харайыыта буолар. Василий Иванович, үгэс курдук, дьыл хайдах киирэриттэн тутулуга суох убаһаны күһүн эрдэ ийэтиттэн арааран, иитиигэ чахчы сыл тахсар кыахтаахтары, толору куҥнаах таастаах убаһалары хаалларара. Кыһынын мэччирэҥнээх сирдэринэн кэритэн хастарара.
Уопуттаах сылгыһыт улахан болҕомтотун атыырдар көҕүйэр кэмнэрин таба туһаныыга уурара. Ити бириэмэҕэ Василий Иванович саптарыыны тэрээһиннээхтик ыытара. Ол да иһин биэлэрэ эрдэ төрүүллэрэ, оттон кулуннара сайын күөххэ өллөнөн, уойан кыһыны улаханнык эмсэҕэлээбэккэ туорууллара.
Тиҥэһэлэри биэҕэ тахсыыларыгар былааннаахтык бэлэмнээһин – рекордсмен сылгыһыт ситиһиитин атын мэктиэтинэн буолар. Итини кини сылгы бу сааһыгар тииһииринэн уонна маҥнайгы ууланыытынан быһаарара.
Дьэ ити курдук өр сылларга сылгы иитиитигэр баай уопуту мунньуммут Василий Иванович Смирников оройуоҥҥа хаһан даҕаны ситиһиллибэтэх үрдүк көрдөрүүллэмитэ. Ол атыттарга, эдэрдэргэ үтүө холобурунан буолар.
Сэмэн Жендринскэй